अहमदनगर / नगर सह्याद्री : भिंगार कॅम्प पोलीस ठाणे हद्दीतून एक अल्पवयीन मुलगा व मुलीला अज्ञात व्यक्तीने पळवून नेल्याची घटना समोर आली आहे. याप्रकरणी भिंगार कॅम्प पोलीस ठाण्यात दोन स्वतंत्र गुन्हे दाखल करण्यात आले आहेत. पोलीस त्या अल्पवयीन मुलगा व मुलीचा शोध घेत आहे.
भिंगार कॅम्प पोलीस ठाणे हद्दीतून एका 16 वर्षीय अल्पवयीन मुलीला अज्ञात व्यक्तीने फूस लावून पळवून नेल्याची घटना शनिवारी (दि. 3) सकाळी आठ ते साडेअकराच्या दरम्यान घडली. याप्रकरणी पीडित मुलीच्या आईने रात्री उशिरा भिंगार कॅम्प पोलिसांना माहिती देत फिर्याद दिली आहे.
फिर्यादी मुळच्या उत्तरप्रदेश राज्यातील असून त्या सध्या कुटुंबासह भिंगार परिसरात राहत आहे. त्यांची 16 वर्षीय अल्पवयीन मुलगी घरी असताना तिला अज्ञात व्यक्तीने पळवून नेल्याचे त्यांनी फिर्यादीत म्हटले आहे. पोलीस उपनिरीक्षक निसार शेख तपास करीत आहेत.
15 वर्षीय अल्पवयीन मुलाला अज्ञात व्यक्तीने पळवून नेल्याची घटना शनिवारी सायंकाळी सहाच्या सुमारास घडली. याप्रकरणी पीडित मुलाच्या वडिलाने रविवारी (दि. 4) सायंकाळी भिंगार कॅम्प पोलिसांना माहिती देत फिर्याद दिली आहे. पोलिसांनी अज्ञात व्यक्तीविरोधात अपहरणाचा गुन्हा दाखल केला असून अधिक तपास पोलीस उपनिरीक्षक शेख करीत आहेत.
