सुपा / नगर सह्याद्री
पारनेर तालुक्यात अवकाळी पाऊस व गारपिटीमुळे पोल्ट्री व्यवसाला मोठा फकटा बसला आहे. अवकाळीमुळे ५ हजार पक्षी मृत्यूमुखी पडल्याची घटना घडली आहे. आधीच कंपन्याच्या मनमानी पद्धतीने व बाजार भावाच्या अनियमितपणामुळे मेटाकुटीला आलेल्या पोल्ट्री व्यायसायिक शेतकऱ्यांना गारपिटीमुळे एका नवीन संकटाचा सामना करावा लागला आहे.
पांडुरंग पवार (रा.निघोज ता.पारनेर) यांचे ९ हजार पक्ष्यांचे पोल्ट्री शेड आहे. रविवार (दि.२६) सायंकाळी ४ वाजता गारपीट झाली. या गारपिटीने ५ हजार पक्षी मृत्यूमुखी पडले आहेत.
वाऱ्याने शेडचे पडदे फाटले. वायररोप तुटून १० ते १२ लाखांचे नुकसान झाले. त्याचप्रमाणे अक्षय म्हस्के (रा.सांगवी सुर्या) व इतर पोल्ट्री व्यवसायिकांचेही मोठ्या प्रमाणावर नुकसान झाले असल्याची माहिती पारनेर तालुका अध्यक्ष सर्जेराव भोसले व सचिव राजाराम गजरे यांनी अहमदनगर पशुसंवर्धन उपायुक्त तुबांरे यांना दिली. संबंधित शेतकऱ्यांना शासनाकडून नुकसान भरपाई मिळावी अशी मागणी त्यांनी यावेळी केली.
महाराष्ट्र पोल्ट्री योद्धा संघटनेचे अध्यक्ष अनिल खामकर, साळवी व गोंडाबे हे नुकसान भरपाई मिळावी यासाठी विशेष प्रयत्न करत आहेत. अहमदनगर जिल्हाध्यक्ष गणेश झावरे, प्रविण धरम, आशिष वामन म्हस्के यांनी शेतकऱ्यांशी संपर्क साधत सविस्तर माहिती घेतली व संघटनेच्या वतीने सहकार्य करणार असल्याचे सांगितले.
