अहिल्यानगर । नगर सहयाद्री:-
शहरातील साई कॉलनी परिसरात साक्षीदाराला पत्राद्वारे धमकी दिल्याचा प्रकार घडला. याप्रकरणी कोतवाली पोलिस ठाण्यात फिर्याद दिली आहे. त्यानुसार अहिल्यानगर कारागृहातील आरोपी किरण बबन कोळपे (विळद, ता. नगर) याच्या विरोधात गुन्हा दाखल करण्यात आला आहे. तक्रारदार आणि आरोपी यांच्यात पूर्वीपासून ओळख असून, तक्रारदार एका गुन्ह्यात साक्षीदार आहे. याच प्रकरणावरून आरोपीने जिल्हा कारागृहातून पत्र पाठवून धमकी दिली, असे तक्रारीत स्पष्ट करण्यात आले आहे. या पत्रात आरोपीने स्वतःच्या पोलिस खात्यातील १५ वर्षांच्या सेवाचा उल्लेख करत तपास अधिकाऱ्यांसह साक्षीदाराला धमकावल्याचा आरोप करण्यात आला आहे. तक्रारदाराने यापूर्वीही संबंधित आरोपीविरुद्ध विविध तक्रारी दाखल केल्याची माहिती समोर आली आहे.
विसर्जन मिरवणुकीत एकाला मारहाण
शिराढोण (ता. नगर) येथील गणपती विसर्जन मिरवणुकी दरम्यान बॅनर लावण्याच्या वादातून एका व्यक्तीस मारहाण केल्याचा प्रकार शनिवारी घडला. याप्रकरणी सोमनाथ तात्याभाऊ बाघ यांच्यासह पाच जणांवर नगर तालुका पोलिस ठाण्यात गुन्हा दाखल करण्यात आला आहे. सदरची घटना ६ सप्टेंबर रोजी सायंकाळी ६ वाजता शिराढोण येथील माळवाडी शिवारात घडली.तक्रारदार सुनिल राजेंद्र दरेकर यांनी गणपती विसर्जन मिरवणुकी दरम्यान बॅनर लावला होता. यावरून वाद झाला आणि सोमनाथ बाघ, अरुण बाघ, हरिष वाघ, मिनाबाई बाघ, तात्याभाऊ बाघ यांच्यासह काही अज्ञात व्यक्तींनी मिळून दरेकर यांना शिवीगाळ करत लाथाबुक्क्यांनी मारहाण केली, तसेच जीवे मारण्याची धमकी दिली असल्याचे फिर्यादीत नमूद करण्यात आले आहे. याप्रकरणाचा पुढील तपास सपोनि प्रल्हाद गिते यांच्या मार्गदर्शनाखाली पोलीस करत आहे.
जलशुद्धीकरण केंद्रातील कॉपर कॉइल लंपास
विलद येथील महानगरपालिकेच्या जलशुद्धीकरण केंद्रातील ट्रान्सफॉर्मरमधून सुमारे ३५ हजार रुपये किमतीची कॉपर कॉइल लंपास केल्याची घटना उघडकीस आली आहे. या प्रकरणी एमआयडीसी पोलिस ठाण्यात अज्ञात चोरट्यांविरोधात गुन्हा दाखल करण्यात आला आहे. सदरची घटना ६ सप्टेंबर रोजी पहाटेच्या सुमारास घडली. जलशुद्धीकरण केंद्राच्या आवारात असलेल्या जुन्या ट्रान्सफॉर्मरची वरची प्लेट उघडून चोरट्यांनी कॉपर कॉइल चोरून नेली. माहिती मिळाल्यानंतर पोलिसांनी घटनास्थळाची पाहणी केली. परिसरातील सीसीटीव्ही फुटेज ताब्यात घेतले असून पुढील तपास पोलीस करत आहे. जलशुद्धीकरण केंद्रातील तांत्रिक यंत्रणेतील ही चोरी गंभीर मानली जात असून, यामुळे काही प्रमाणात पाणीपुरवठा योजनेवर परिणाम होण्याची शक्यता आहे. ट्रान्सफॉर्मरमध्ये झालेल्या छेडछाडमुळे विद्युत पुरवठ्यावरही ताण येण्याची शक्यता प्रशासनाने व्यक्त केली आहे.
