Ahmednagar Crime News : अहमदनगर / नगर सह्याद्री – विवाहितेवर पती व दिराने शारीरिक अत्याचार केला. याप्रकरणी पीडित विवाहितेने तोफखाना पोलीस ठाण्यात दिलेल्या फिर्यादीवरून अत्याचाराचा गुन्हा दाखल करण्यात आला होता. या गुन्ह्यात पतीला तोफखाना पोलिसांनी ताब्यात घेतले आहे.
सुरूवातीला त्याला सायबर पोलीस ठाण्यातील एका गुन्ह्यात ताब्यात घेतले होते. सायबर पोलिसांनी संशयित आरोपीला तोफखाना पोलिसांच्या ताब्यात दिले. पीडित विवाहितेचे सासर मुंबई असून, तिथेच तिच्यावर अत्याचार झाला. विवाहिता नगरमध्ये माहेरी आल्यानंतर या प्रकाराला वाचा फुटली. तोफखाना पोलीस ठाण्यात पती, दीर व सासू-सासर्यांवर गुन्हा दाखल करण्यात आला आहे.
पीडित विवाहितेचा मे २०२३ मध्ये आरोपी पतीशी विवाह झाला. लग्नानंतर काही दिवसांत सासरच्यांनी विवाहितेचा माहेरहून पैसे आणण्यासाठी छळ सुरू केला. मुंबई येथे सासरी असताना पती व दिराने विवाहितेवर अत्याचार करत मारहाण केली. घडलेला प्रकार कोणाला सांगितल्यास शारीरिक संबंध करतानाचे व्हिडीओ व्हायरल करण्याची धमकी दिली होती. याप्रकरणी येथील तोफखाना पोलीस ठाण्यात गुन्हा दाखल केला होता.
दरम्यान, पीडित विवाहितेच्या फिर्यादीवरून तिच्या पती विरोधात येथील सायबर पोलीस ठाण्यातही गुन्हा दाखल केला होता. या गुन्ह्यात सायबर पोलिसांनी पीडितेच्या पतीला मुंबई येथून ताब्यात घेतले होते. त्याला अत्याचाराच्या गुन्ह्यात तोफखाना पोलिसांच्या ताब्यात दिले आहे.
