अहमदनगर । नगर सहयाद्री: –
मुळा धरणाची एकूण साठवण क्षमता २६ टीएमसी एवढी असुन आजघडीला धरणाच्या जलाशय परिचालन सूचीनुसार लोअर गाईड व अप्पर गाईड कर्व्हनुसार पाणीसाठा नियंत्रित ठेवणे आवश्यक आहे. त्यामुळे आज सोमवार १२ ऑगस्ट रोजी दूपारी ३ वाजता मुळा धरणातून २ हजार यूसेसने नदीपात्रामध्ये पाण्याचा विसर्ग सोडण्यात आले.
आपत्कालीन परिस्थितीमध्ये आवश्यकता भासल्यास मुळा धरणातून नदीपात्रामध्ये टप्प्याटप्प्याने विसर्ग वाढवण्यात येणार असुन मुळा नदीकाठच्या गावांनी आवश्यक ती दक्षता घेण्याचे आवाहन मुळा पाटबंधारे विभागाच्या कार्यकारी अभियंता सायली पाटील यांनी केले आहे. नदीकाठावरील गावातील नागरिकांनी नदीपात्रातील चल मालमत्ता, चीजवस्तु, वाहने, पशुधन, शेती अवजारे व इतर मनुष्य उपयोगी संसाधने सुरक्षित स्थळी स्थलांतरित करावी. नदीपात्रात प्रवेश करु नये. कुठलीही जिवित व वित्त हानी होणार नाही याबाबत दक्षता घेण्याचे आवाहनही प्रसिद्धी पत्रकाद्वारे केले आहे.
भंडारदरा पाणलोटात पावसाचे प्रमाण वाढले
उत्तर नगर जिल्ह्याची जीवनदायिनी असलेल्या भंडारदरा पाणलोटात काल रविवारी शुक्रवार आणि शनिवारच्या तुलनेत पावसाचे प्रमाण वाढल्याने ११०३९ दलघफू क्षमतेचे हे धरण आज-उद्या पूर्ण क्षमतेचे भरण्याची शयता आहे. काल सायंकाळी धरणातील पाणीसाठा १०५९९ दलघफू झाला होता. जुलैच्या शेवटच्या आठवड्यात जोरदार पाऊस सुरू झाल्याने ३१ जुलैला भंडारदरा धरण तांत्रिकदृष्ट्या भरले होते. पाणी पातळी कायम ठेऊन येणारी आवक विसर्ग सोडण्यात येत होता.
