अहमदनगर। नगर सहयाद्री
पोटच्या मुलानेच जन्मदात्या बापाने शेतजमीन नावावर करून देत नाही म्हणून वाद करत खून केल्याची संतापजनक घटना नगर जिल्ह्यातील राहाता तालुक्यातील कोऱ्हाळे गावात घडली. गणपत संभाजी कोळगे (वय ८०, रा. जाधव वस्ती, कोऱ्हाळे, ता. राहाता) असे दुर्दैवी बापाचे नाव असून खून करणारा पोटचा नराधम मुलगा अनिल गणपत कोळगे (वय ५३) फरार झाला आहे.
अधिक माहिती अशी : मुलगा अनिल गणपत कोळगे (वय ५३) याने शेतजमीन त्याच्या नावावर करून देत नसल्याच्या कारणावरून वडील गणपत संभाजी कोळगे (वय ८०, रा. जाधव वस्ती, कोऱ्हाळे, ता. राहाता) यांना लाकडी काठीने व लाथाबुक्क्यांनी बेदम मारहाण केली. त्यात त्यांचा मृत्यू झाला. त्यानंतर आरोपी अनिल कोळगे हा फरार झाला आहे.
मयत गणपत कोळगे यांचा मृतदेह लोणी येथील प्रवरा रुग्णालयात शवविच्छेदन करून नातेवाईकांच्या ताब्यात देण्यात आला. याप्रकरणी नातेवाईक अमोल विश्वनाथ साळवे (रा. कोल्हेवाडी, ता. संगमनेर) यांनी राहाता पोलीस ठाण्यात फिर्याद दिली असून गुन्हा दाखल करण्यात आला असून पुढील तपास पोलीस करीत आहे.
