लोणावळा / नगर सह्याद्री : मनोज जरांगे पाटील यांनी आता लोणावळ्यातून मुंबईला जाण्याची घोषणा केली आहे. पोलिसांनी आझाद मैदानात मराठा आरक्षणाच्या आंदोलकांना परवानगी नाकारली असली तरी त्यांनी ही घोषणा आता केली आहे.
वाटेत शिष्टमंडळ भेटण्यासाठी येणार असल्याचेही त्यांनी सांगितले आहे. जरांगेंनी मुख्यमंत्र्यांनी, दोन उपमुख्यमंत्र्यांनी यावे असे आवाहन करत आपण दुपारपर्यंत लोणावळ्यात थांबल्याचे स्पष्ट केले होते. मला मुंबईला यायची हौस नाहीय. इथेच आरक्षण मिळाले तर तिकडे येऊन काय करणार, असा सवालही त्यांनी उपस्थित केला आहे.
दरम्यान त्यांनी आंदोलकांना सावधही केले आहे. ते म्हणालेत की, मोर्चात काही अनुचित प्रकार घडल्यास त्याला थेट पोलिसांच्या ताब्यात द्या. हे लोक काहीही करू शकतात, मोर्चात घुसू शकतात सावध रहा असे ते म्हणाले आहेत. मी नोटीसीवर सही केली. कोर्टाची होती म्हणून केली आहे. माझे नाव कसे असे विचारले असता तुम्ही प्रमुख म्हणून तुम्हाला नोटीस दिल्याचे सांगितले. काही हरकत नाही. मी आता मुंबईला निघालो आहे. आरक्षण घेतल्याशिवाय माघारी येणार नाही, असे जरांगे पाटील म्हणाले.
