मुंबई / नगर सह्याद्री :
Political News Today : महाराष्ट्र नवनिर्माण सेनेचे अध्यक्ष राज ठाकरे व मुख्यमंत्री एकनाथ शिंदे हे एकत्र येतील अशी चर्चा आहे. राज ठाकरे व एकनाथ शिंदे यांच्या अलीकडील काळात अनेक भेटी झाल्या. काल पुन्हा एकदा राज ठाकरे हे शिंदे यांच्या भेटीला गेले होते.
जवळपास तासभर त्यांच्यात चर्चा झाली. लोकसभा निवडणुकीच्या तोंडावर शिंदे आणि राज ठाकरे यांच्या भेटीगाठी वाढल्याने राजकीय वर्तुळात चर्चा रंगल्या आहेत. दरम्यान आता आमदार संजय शिरसाट यांनी शिवसेना-मनसे फेब्रुवारी महिन्यात एकत्र येतील, हे दोन्ही नेते एकत्र येऊ शकतील असा दावा केला आहे. राज ठाकरे यांनी जाहीर भाषणात आणि पत्रकार परिषदांमध्ये शिवसेना शिंदे गटाच्या बंडाचं समर्थन केलं होतं.
तर, शिवसेना उद्धव ठाकरेंना महाविकास आघाडीसोबत गेल्यावरुन टोलाही लगावला होता. दरम्यान मनसे व उद्धव ठाकरे एकत्र येतील असे म्हटले जात होते. पण आता मुख्यमंत्री एकनाथ शिंदे यांच्या नेतृत्त्वातील शिवसेना आणि मनसे एकत्र येईल असा दावा शिंदे गटाचे आमदार संजय शिरसाट यांनी केलाय.
राज ठाकरे यांनी गुरुवारी सकाळी ‘वर्षा’वर जाऊन एकनाथ शिंदे यांची भेट घेतली. यावेळी शिंदे यांनी राज यांचे पुष्पगुच्छ देऊन स्वागत केले. राज ठाकरे यांच्यासोबत मनसेचे नेते बाळा नांदगावकर उपस्थित होते. या बैठकीत सर्वोच्च न्यायालयाच्या आदेशानंतर दुकाने आणि आस्थापनावरील मराठी भाषेतील पाट्या, टोलनाके, धारावी झोपडपट्टी पुनर्विकास आदी मुद्यांसह सद्य राजकीय परिस्थितीवर चर्चा झाल्याचे समजते.
