नगर सह्याद्री / नागपूर : नागपूर येथे आजपासून विधिमंडळाचे हिवाळी अधिवेशन सुरु झाले आहे. पहिल्याच दिवशी आज उपमुख्यमंत्री तथा वित्त व नियोजन मंत्री अजित पवार यांनी ५५ हजार ५२० कोटींच्या पुरवणी मागण्या सभागृहात सादर केल्या.
आगामी निवडणूक लक्षात घेऊन हे बहुतेक शेवटचे अधिवेशन होईल असे म्हटले जात असल्याने अजित पवारांनी ५५ हजार ५२० कोटींच्या पुरवणी मागण्या मांडल्या. जुलै महिन्यात पार पडलेल्या पावसाळी अधिवेशनात सुमारे ४१ हजार कोटींच्या पुरवण्या मागण्या त्यांनी सादर केल्या होत्या. तो विक्रम यंदा अजित पवार यांनीच मोडीत काढत आज इतक्या मोठ्या प्रमाणात मागण्या मांडल्या. आगामी निवडणुका डोळ्यासमोर ठेवून अजितदादांनी कोटींची उड्डाणे घेऊन पुरवणी मागण्या सादर केल्याची चर्चा रंगलीय.
डिसेंबर २०२३ च्या हिवाळी अधिवेशनात एकूण रु. ५५,५२०.७७ कोटींच्या पुरवणी मागण्या विधीमंडळात सादर करण्यात येत आहेत. यापैकी रु. १९,२४४.३४ कोटीच्या अनिवार्य, रु. ३२,७९२.८१ कोटींच्या कार्यक्रमांतर्गत व रु. ३,४८३.६२ कोटींच्या रकमा केंद्र पुरस्कृत कार्यक्रमांतर्गत अर्थसहाय्य उपलब्ध होण्याच्या अनुषंगाने पुरवणी मागण्या आहेत.
महत्त्वाच्या पुरवणी मागण्या
जल जीवन मिशन : ४२८३ कोटी
मनपा क्षेत्रात पायाभूत सुविधांसाठी : ३०० कोटी
पंतप्रधान पीक विमा योजना : २७६८ कोटी
शिक्षक व शिक्षकेतर कर्मचाऱ्यांचे वेतन : २७३८ कोटी
रस्ते बांधकाम : २४५० कोटी
श्रावण बाळ निवृत्तीवेतन योजना : २३०० कोटी
आशियाई विकास बँकेकडून प्राप्त होणारे कर्ज : २२७६ कोटी
नमो शेतकरी सन्मान निधी : २१७५ कोटी
यंत्रमाग, कृषिपंप ग्राहकांना विजदरात सवलत : १९९७ कोटी
पंतप्रधान आवास घरकुल योजना : १००० कोटी
मुंबई मेट्रो- मुद्रांक शुल्काचे प्रदान : १००० कोटी
स्वयंसहायता गटांना फिरता निधी : ९९६ कोटी
पोलिस कार्यालयीन इमारतींचे बांधकाम : ६९८ कोटी
संजय गांधी निराधार योजना अनुदान : ६८७ कोटी
पाटबंधारे विकास महामंडळांना अंशदान : ६०० कोटी
