Lok Sabha Election 2024 आगामी लोकसभा निवडणुकीच्या पार्श्वभूमीवर पुन्हा एकदा दिल्लीत महायुतीची रात्री उशिरापर्यंत बैठक पार पडली. या बैठकीसाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांची उपस्थिती होती. बैठकीमध्ये जागावाटपाचा फॉर्म्युलावर शिक्कामोर्तब झाल्याची झाल्याची माहिती समोर आली आहे.
महायुतीच्या जागावाटपाबाबत तिन्ही पक्षातील नेत्यांना प्रश्न पडला होता. त्यातच मनसे अध्यक्ष राज ठाकरे यांनी दिल्लीत जाऊन अमित शहा यांची भेट घेतल्यानंतर मनसे देखील महायुतीत सहभागी होणार अशा चर्चा सुरू झाल्या. मनसे महायुतीसोबत आल्यास त्यांना किती जागा मिळणार? याकडे देखील अनेकांचं लक्ष लागून होते.
दरम्यान केंद्रीय गृहमंत्री अमित शहा यांनी शनिवारी (ता. २३) रात्री दिल्लीत महायुतीच्या नेत्यांची महत्वाची बैठक घेतली. बैठकमध्ये भाजप हा महायुतीत मोठा भाऊ असल्याने त्यांना लोकसभेच्या ३० जागा मिळणार आहे. त्यापाठोपाठ शिंदे गटाला १३ जागा, अजित पवार गटाला ४ जागा आणि राज ठाकरे यांच्या मनसेला १ जागा मिळणार असल्याची माहिती समोर आली आहे.
मनसेला दक्षिण मुंबईतील जागा मिळणार असल्याचं सूत्रांनी सांगितलं आहे. बैठकीतील महत्वाची बाब म्हणजे, एकनाथ शिंदे यांच्या शिवसेनेच्या ५ ते ६ जागांवर नवीन उमेदवार देण्यात यावेत, अशी चर्चाही झाली आहे. त्यामुळे शिंदे गटातून नेमकं कुणाचं तिकीट कापलं जाणार? याकडेही सर्वाचं लक्ष लागलं असून आज भाजपकडून लोकसभा निवडणुकीसाठी उमेदवारांची यादी जाहीर होणार असल्याची माहिती आहे.
