उल्हासनगर / नगर सह्याद्री : भारतीय जनता पार्टीचे आमदार गणपत गायकवाड यांनी कल्याणचे शिवसेना शिंदे गटाचे शहरप्रमुख महेश गायकवाडयांच्यावर गोळीबार केला. उल्हासनगरच्या हिललाईन पोलीस ठाण्यात वरिष्ठ पोलीस निरिक्षकाच्या केबिनमध्येच हा गोळीबाराचा थरार झाला.
या घटनेचे थरारक सीसीटीव्ही फुटेज सध्या व्हायरल होत आहेत. यामध्ये गायकवाड हे केबिनमध्ये जात बेछूट गोळीबार करताना दिसत होते. उल्हासनगरच्या द्वारली येथील जमिनीवरून गणपत गायकवाड आणि महेश गायकवाड यांच्यात शीतयुद्ध सुरु होते.
या वादग्रस्त जागेवर महेश गायकवाड यांनी कब्जा केला होता असा आरोप आहे. त्याचबाबत गणपत गायकवाड यांचे सुपुत्र वैभव गायकवाड पोलीस ठाण्यात तक्रार नोंदवण्यास गेले होते. तिथे महेश गायकवाड आणि राहुल पाटील हेदेखील पोहचले. हिललाईन पोलीस निरिक्षकांच्या केबिनमध्ये दोन्ही गटाचे प्रमुख लोक बसले होते. पोलीस स्टेशनच्या बाहेर मोठी गर्दी होती. त्यात काही वाद झाल्याने पोलीस निरिक्षक उठून बाहेर गेले.
तितक्यात आमदार गणपत गायकवाड यांनी दुसऱ्या दरवाजाने प्रवेश घेतला. त्यावेळी महेश गायकवाड, राहुल पाटील यांचे लक्ष नसताना अचानक त्यांच्यावर गायकवाड यांच्याकडून गोळीबार सुरू झाला. राहुल पाटील यांनी वाचण्याचा प्रयत्न केला. त्यात राहुल पाटील यांच्या हाताला, खांद्याला गोळी लागली. मात्र गायकवाड यांनी महेश गायकवाड यांच्यावर ६ गोळ्या झाडल्या. पोलिसांनी धाडसाने आमदार गणपत गायकवाड यांना रोखून तात्काळ ताब्यात घेतले. तर महेश गायकवाड, राहुल पाटील या दोन जखमींना रुग्णालयात उपचारासाठी नेले आहे.
