नवी दिल्ली-
Udhav Thackeray News: इंडिया आघाडीचा चेहरा म्हणून तुम्ही स्वतःकडे कसे पाहता, असे विचारले असता ‘उबाठा’ नेते उद्धव ठाकरे यांनी ‘मला हरभर्‍याच्या झाडावर चढवू नका. माझ्यासमोर कोणतीच स्वप्ने नाहीत’ असे त्यांनी सांगितले.
उबाठाचे उद्धव ठाकरे सध्या इंडिया आघाडीच्या बैठकीसाठी दिल्लीमध्ये आहेत. माध्यमांशी बोलताना ते म्हणाले की, इंडिया आघाडीचा समन्वयक, चेहरा ठरवण्याची वेळ आली आहे. बैठकीमध्ये याबाबत चर्चा होईल. पंतप्रधान पदाचा चेहरा नाही पण निमंत्रक कोणीतरी असावा. सगळ्यांना एकत्र आणण्यासाठी चेहरा हवा. अरविंद केजरीवाल हे नाराज नाहीत. त्यांच्याशी माझी चर्चा झाली आहे. जनता जे ठरवेल ते आम्ही करु.
उगाच अकलेचे तारे तोडण्यात काही अर्थ नाही. सगळ्यांशी बोलू. सगळेजण देशातील लोकशाही टिकविण्यासाठी एकत्र आले आहेत. मी देखील काही नावे सूचवणार आहे. मी मुख्यमंत्री पद जबाबदारी म्हणून स्वीकारावे लागले. माझ्यासमोर देशाची, महाराष्ट्राची जनता आहे. जनतेला काय हवे, हे पाहणे महत्त्वाचे आहे.
घोडा मैदान जवळ आले आहे. सर्व सैनिक जमा झाले आहेत. त्यामुळे पुढे जाण्यासाठी एक चेहरा आवश्यक आहे. यावेळी त्यांनी देवेंद्र फडणवीस यांना टोला लगावला. देशाची लोकशाही हाच आमचा स्वार्थ आहे. त्यांचे काय करायचे ते त्यांनी करावे. जसे मध्य प्रदेशात शिवराज बदलले तसे मोदींना पण बदलू शकतात.
