अहमदनगर । नगर सहयाद्री:-
नगर-सोलापूर रस्त्यावरील घोगरगाव शिवारात गुरुवारी सकाळी साडेअकराच्या सुमारास झालेल्या भीषण अपघातात दोन तरुणांचा मृत्यू झाला आहे. शेखर नवनाथ मिसाळ (वय ३४) आणि राजेश बबन थोरात (वय २६), दोघेही राहणार अंभोरा (ता. आष्टी) असे मयत तरुणाचे नाव आहे.
सदर अपघाताची घटना घोगरगाव शिवारातील बाह्यवळण रस्त्यावर भोस वस्ती चौकात घडली. कंटेनरने एका मोटारकारला धडक दिली. या भीषण अपघातात आष्टीचे शेखर मिसाळ आणि राजेश थोरात शंभर फुटांवर फेकले गेले. तात्काळ ग्रामस्थांनी घटनास्थळी धाव घेत मदत कार्य सुरू केले आणि जखमींना रुग्णवाहिकेतून जिल्हा रुग्णालयात दाखल केले.
दरम्यान शेखर मिसाळ यांचा घटनास्थळीच मृत्यू झाला, तर राजेश थोरात यांचा उपचारादरम्यान मृत्यू झाला. या दुर्दैवी घटनेने परिसरात हळहळ व्यक्त केली जात आहे. श्रीगोंदा पोलिस ठाण्यात या अपघाताची अकस्मात मृत्यूची नोंद करण्यात आली आहे.
