अहमदनगर। नगर सह्याद्री-
मुलगी झाली म्हणून व आई-वडिलांकडून पाच लाख रूपये घेऊन येण्यासाठी विवाहितेचा सासरच्यांनी छळ केला. याप्रकरणी नगर तालुयातील वाळकी येथे माहेरी राहणार्या पीडित विवाहितेने बुधवारी (दि. २८) नगर तालुका पोलीस ठाण्यात दिलेल्या फिर्यादीवरून सहा जणांविरोधात गुन्हा दाखल करण्यात आला आहे.
पती अविनाश रामलाल चव्हाण, सासरे रामलाल यादव चव्हाण, भाया अशोक रामलाल चव्हाण, जाऊ संगीता अशोक चव्हाण, पुतण्या अंकित अशोक चव्हाण, सवत वर्षा अविनाश चव्हाण (सर्व रा. टिळेकर वस्ती, मगरपट्टा, हडपसर, पुणे) अशी गुन्हा दाखल झालेल्यांची नावे आहेत.
फिर्यादी यांचा विवाह अविनाश चव्हाण याच्या सोबत झाल्यानंतर त्या बाबुर्डी घुमट (ता. नगर) येथे सासरी नांदत असताना अविनाश व इतरांनी त्यांना आई-वडिलांकडून पाच लाख रूपये घेऊन ये, तुला मुलगी झाली आहे, या कारणावरून वेळोवेळी शिवीगाळ, मारहाण केली.
तु परत आमच्या घरी नांदायला आली तर जीवे मारण्याची धमकी देऊन वेळोवेळी उपाशीपोटी ठेऊन मानसिक व शारिरीक छळ केला. तसेच अविनाश याने फिर्यादीसोबत घटस्फोट न घेता वर्षा सोबत दुसरा विवाह केला. इतरांनी अविनाश याला दुसरा विवाह करण्यास मदत केली.दरम्यान यासंदर्भात फिर्यादी यांनी भरोसा सेलकडे तक्रार दाखल केली होती. तेथे समझोता न झाल्याने बुधवारी (दि. २८) नगर तालुका पोलीस ठाण्यात गुन्हा दाखल झाला आहे. अधिक तपास पोलीस अंमलदार माने करीत आहेत.
