पुणे / नगर सह्याद्री –
मूळ राष्ट्रवादी काँग्रेस पक्षाचा काल मंगळवार १० जून रोजी २६ वा वर्धापन दिन दोन वेगवेगळ्या ठिकाणी मोठ्या जल्लोषात साजरा करण्यात आला. दोन्ही ठिकाणी पक्षातील नेत्यांसह पक्ष प्रमुखांनी जोरदार भाषणे केली. शरद पवार यांच्या राष्ट्रवादी काँग्रेस पक्षाचे प्रदेशाध्यक्ष जयंत पाटील यांनी तर थेट प्रदेशाध्यक्ष पदावरून मुक्त करण्याची इच्छा व्यक्त केली.
त्यामुळे जयंत पाटील वेगळा निर्णय घेणार असल्याच्या चर्चांना पेव फुटले. तर दुसरीकडे जयंत पाटील यांचे भाचे माजी आमदार प्राजक्त तनपुरे यांनी वर्धापन दिनाच्या कार्यक्रमाला दांडी मारल्याने मामा-भाचे वेगळा निर्णय घेण्याच्या तयारीत असल्याचा चर्चा राज्याच्या राजकारणात सुरू झाल्या आहेत.
जयंत पाटील यांनी वर्धापन दिनाच्या कार्यक्रमात प्रदेशाध्यक्ष पदावर मुक्त करण्याची इच्छा शरद पवार यांच्याकडे व्यक्त करत नव्या चेहऱ्यांना संधी देण्याचे भाष्य केले होते. त्यांचे भाषण सुरू असताना नगर राहुरी मतदार संघाचे माजी आमदार प्राजक्त तनपुरे हे उपस्थित नव्हते. त्यामुळे तनपुरे यांनी पक्षाच्या वर्धापन दिनाच्या कार्यक्रमाला दांडी मारल्याने राजकीय वर्तुळात चर्चांणा उधान आले आहे.
काही दिवसांपूर्वीच प्राजक्त तनपुरे यांना राहुरीच्या तनपुरे साखर कारखाना निवडणुकीत विखे कुटुंबाने आतून मदत केली, असे सांगितले जात आहे. तसेच राजकारणात सगळेच पत्ते उघडून दाखवायचे नसतात, असे एका मुलाखती दरम्यान तनपुरे यांनी केलेले विधान आगामी राजकीय वाटचालीचे संकेत सांगून जात आहे.
जयंत पाटील काय म्हणाले?
मला पवार साहेबांनी बरीच संधी दिली. सात वर्षाचा कालावधी दिला. शेवटी पक्षाने नव्या चेहऱ्यांना संधी देणे आवश्यक आहे. तुम्हा सर्वांसमोर साहेबांना विनंती करेन की, नवीन लोकांना संधी द्यावी, अशी मागणी जयंत पाटील यांनी शरद पवार यांच्याकडे बोलताना केली. शेवटी पक्ष पवार साहेबांचा आहे. पवार साहेबांनी यावर योग्य निर्णय घ्यावा, असेही ते म्हणाले.
