अहमदनगर। नगर सहयाद्री
शहरातील मार्केट यार्डच्या आवारात दुकानदाराच्या मारहाणीत एका वृध्द व्यक्तीचा मृत्यू झाल्याचा धक्कादायक प्रकार समोर आला आहे. यात वृध्द व्यक्तीच्या जखमी बहिणींच्या जबाबावरून कोतवाली पोलीस ठाण्यात गुन्हा दाखल करण्यात आला आहे.
एका पत्र्याच्या शेडमध्ये राहत असलेल्या वृध्द महिला व तिच्या वृध्द भावाला तेथून हुसकावून लावण्यासाठी तिघांनी मारहाण केल्याची घटना शनिवारी (दि. ९) रात्री घडली. कुसुम कुंभारे व त्यांचा भाऊ बाळू नागपुरे हे मार्केट यार्डमध्ये बसलेले असताना त्यांच्या बाजूला असलेल्या दुकानाचे मालक व दोन अनोळखी व्यक्तींनी तुम्ही येथे रहायचे नाही, तुम्ही निघून जा, असे म्हणत दोघांना मारहाण केली.
यात कुसुम हरिभाऊ कुंभारे (वय ६५, मूळ रा. भिंगार) ही वृध्द महिला जखमी असून तिचा भाऊ बाळू विठोबा नागपुरे (वय ६०) यांचा काल, रविवारी सकाळी मृत्यू झाला आहे. याप्रकरणी दोघा संशयितांना पोलिसांनी ताब्यात घेतले आहे. एका संशयिताचा शोध सुरू आहे. घटना सीसीटीव्हीमध्ये कैद झाली असून डीव्हीआर जप्त करण्यात आला आहे.
