पाटणा / नगरसह्याद्री : भाजपच्या नेतृत्वाखालील केंद्रातील एनडीए सरकारला सत्तेतून खाली खेचण्यासाठी विरोधकांनी एकत्रित येत इंडिया आघाडी स्थापन केली. पाटणा, बंगळुरू आणि मुंबई येथे बैठका पार पडल्यानंतर आज चौथी बैठक नवी दिल्ली येथे होणार आहे.
मात्र या बैठकीआधी बिहारची राजधानी असलेल्या पाटणा इथं मुख्यमंत्री नितीश कुमार यांच्या समर्थकांनी लावलेल्या पोस्टर्सची चर्चा होऊ लागली आहे. पाटण्यात लावलेल्या पोस्टरवर लिहिण्यात आलं आहे की, “जर खरंच विजय हवा असेल तर एक निश्चय पाहिजे,
एक नितीश पाहिजे.” या पोस्टरच्या माध्यातून नितीश कुमार यांना इंडिया आघाडीचा चेहरा घोषित करण्याची मागणी सध्या होताना दिसत आहे. त्यामुळे आता आजच्या बैठकीत इंडिया आघाडीचा चेहरा ठरवण्याबाबत काही चर्चा होते का हे पाहणं गरजेचे आहे.
दरम्यान, नितीश कुमार यांच्या पुढाकारानेच विरोधी पक्षांची पहिली बैठक पाटणा येथे आयोजित करण्यात आली होती. त्यानंतर बंगळुरू येथील दुसऱ्या बैठकीत या आघाडीचं इंडिया असं नामकरण झालं होत. आज इंडिया आघाडीच्या आजच्या बैठकीत जागावाटपासह संयुक्त निवडणूक कॅम्पेनची घोषणा होऊ शकते. तसंच सत्ताधाऱ्यांना घेरण्यासाठी कॉमन अजेंड्यावर चर्चा करून त्याबाबतचा निर्णयाबाबत विविध मुद्द्यांवर चर्चा होऊ शकते.
