Ahmednagar News: अहमदनगर जिल्ह्यातील कोपरगाव शहरात भरदिवसा गोळीबाराची घटना घडल्यामुळे एकच खळबळ उडाली होती. या गोळीबारात एक जण गंभीर जखमी झाला आहे. पोलीस स्टेशनपासून हाकेच्या अंतरावर ही गोळीबाराची घटना घडली असून पुन्हा हे प्रकरण तापले आहे. कारण भाजपचे युवा नेते विवेक कोल्हे यांनी राष्ट्रवादी काँग्रेसचे आमदार आशुतोष काळे आणि त्यांचे स्वीय सहाय्यकांवर गंभीर आरोप केले आहेत.
गुरूवारी संध्याकाळी पाचच्या सुमारास कोपरगाव शहरातील श्री स्वामी समर्थ मंदिर परिसरात हा गोळीबार झाला. या गोळीबारात तणवीर हमीफ रंगरेज (वय 36) हा तरुण जखमी झाला आहे. जखमी तरुणावर नाशिक येथील रुग्णालयात उपचार सुरु आहे. दरम्यान कोपरगाव गोळीबार प्रकरणानंतर भाजप नेते विवेक कोल्हे यांनी आमदार आशुतोष काळे आणि त्यांचे स्वीय सहायक जोशी यांच्यावर गंभीर आरोप केले आहे.
विवेक कोल्हे नेमकं काय म्हणाले?
कोपरगाव शहरातील गोळीबार प्रकरणात जे आरोपी अटक केले त्या आरोपींनी गोळीबार करण्याआधी आमदारांचे बॉस म्हणून स्टेटस ठेवले होते. आरोपीने आमदारांचे फ्लेक्स लाऊन बॉस म्हणून संबोधित केलं असून आमदार आरोपींना राजाश्रय देतात का? असा आरोप त्यांनी आमदार आशुतोष काळेंवर केला आहे. आरोपी नाझिम शेख आमदार आशुतोष काळे यांचा कार्यकर्ता असल्याचेही त्यांनी म्हटले आहे. कोपरगाव शहरात राजरोसपणे अवैध व्यवसाय सुरू आहेत. शहरात गुन्हा करणारे लोक आमदारांचा बिल्ला लाऊन शहरात फिरतात. आमदार म्हणाले विरोधकांना गाडून टाका. येणाऱ्या निवडणुकीत जनता आमदारांना धडा शिकवल्याशिवाय राहणार नाही. जखमी व्यक्तीने गोळीबार करणाऱ्यांची माहिती दिली आहे. पोलीस आरोपींवर काय कारवाई करणार? असा सवाल विवेक कोल्हेंनी उपस्थित केला.
