Politics News:- आगामी विधानसभा निवडणुकांच्या तोंडावर महाराष्ट्रातील राजकीय वातावरण तापत आहे. सत्ताधारी आणि विरोधक एकमेकांवर आरोप-प्रत्यारोप करण्यासाठी सज्ज झाले आहेत. दरम्यान राज्याचे मंत्री छगन भुजबळ यांच्या अडचणींमध्ये आणखी वाढ झाली आहे.
महाराष्ट्र सदन घोटाळा प्रकरणी सामाजिक कार्यकर्त्या अंजली दमानिया यांच्यासह अन्य दोन व्यक्तींनी एक महत्त्वाची याचिका दाखल केली आहे. या याचिकेमध्ये भुजबळ कुटुंबीयांना 2021 मध्ये दोषमुक्त केल्याच्या निर्णयाला आव्हान देण्यात आले आहे. याचिकाकर्त्यांनी याचिकेवर तातडीने सुनावणी घेण्याची मागणी केली आहे, ज्यामुळे भुजबळांच्या अडचणी वाढण्याची शक्यता आहे.
न्यायालयाने भुजबळ आणि त्यांच्या कुटुंबीयांना 9 सप्टेंबर 2021 रोजी दोषमुक्त केले होते. परंतु, त्या निर्णयाला दमानिया, दीपक देशपांडे आणि आमदार सुहास कांदे यांनी तीन स्वतंत्र याचिका दाखल करून आव्हान दिले होते. न्यायालयाने एप्रिलमध्ये या याचिकांवर नोटीसा बजावल्या होत्या, परंतु त्यानंतर या प्रकरणाची सुनावणी थंडावली होती. आता या याचिकांवर तातडीने सुनावणी घेण्याच्या मागणीमुळे निवडणुकांच्या काळात भुजबळांच्या अडचणींमध्ये वाढ होण्याची शक्यता निर्माण झाली आहे.
