बीड | नगर सह्याद्री-
मराठा आरक्षणासाठी मनोज जरांगे आणि मराठा समाजाच्यावतीने सरकारला दिलेली डेडलाईन काही तासांवर आली आहे. मराठा आरक्षणाबाबत मनोज जरांगे यांनी सरकारला दिलेली मुदत २४ डिसेंबर असून, त्यानंतर आरक्षण मागणीसाठी आंदोलनाच्या भूमिकेवर जरांगे ठाम आहेत. दरम्यान त्यापूर्वी आज बीड शहरात मनोज जरांगे यांची इशारा सभा होणार आहे. सभेला राज्यभरातील मराठा आंदोलक उपस्थित राहणार असून आरक्षणाबाबत काय भूमिका घेणार याकडे सर्वांचं लक्ष लागून आहे.
बीड शहरातील डॉ. बाबासाहेब आंबेडकर यांच्या पुतळ्याला पुष्पहार अर्पण करून दहा वाजता रॅलीला सुरुवात होईल. तीन ते चार किलोमीटरची रॅली साधारणतः दोन वाजता बीड शहरातील पाटील मैदानावर पोहचणार असून जरांगे पाटील हे मराठा बांधवांना संबोधित करणार आहेत.
सभेसाठी तब्बल पाच लाख लोकांची गर्दी होण्याचा अंदाज वर्तवण्यात आला आहे. मराठा आरक्षणासाठी दिलेला अल्टिमेटम काही तासांवर आला असून मनोज जरांगे आज काय भूमिका घेणार याकडे संपूर्ण महाराष्ट्राचे लक्ष लागले आहे.
हेलिकॉप्टरमधून पुष्पृष्टी
आयोजकांनी परवानगी मिळावी जिल्हाधिकारी कार्यालयातअर्ज केला होता. अर्ज जिल्हाधिकारी कार्यालयाकडून पोलिस अधीक्षकांकडे देण्यात आल्यावर पोलिस अधीक्षक नंदकुमार ठाकूर यांनी या पुष्पवृष्टीसाठी परवानगी दिलयामुळे सभास्थळी हेलिकॉप्टरमधून मनोज जरांगे यांच्यावर पुष्पृष्टी केली जाणार आहे
