Lok Sabha Election 2024: लोकसभा निवडणुकीसाठी आज १३ मे (सोमवारी) सकाळी सात ते सायंकाळी ६ पर्यंत मतदान प्रक्रिया पार पडणार आहे. एकीकडे निवडणूक प्रक्रियेसाठी निवडणूक यंत्रणा, जिल्हा प्रशासन, पोलीस प्रशासन सज्ज झाले असून सर्वत्र मोठा बंदोबस्त तैनात करण्यात आला आहे. तर दुसरीकडे नेतेमंडळीवर नाराज असलेल्या एका गांवाच्या ग्रामस्थांनी मतदानावर बहिष्कार टाकला आहे.
लोकसभा निवडणुकीच्या चौथ्या टप्प्यासाठी नंदुरबार, जळगाव, रावेर, जालना, संभाजीनगर, मावळ, पुणे, शिरूर, नगर, शिर्डी, बीड या ठिकाणी मतदान होत आहे. अशातच बीड जिल्ह्यातील केज तालुक्यातील मतदारांनी मतदान करणार नसल्याचा आक्रमक पवित्रा घेतला आहे.
केज तालुक्यातील कोरडेवाडी गावातील नागरिकांनी साठवण तलावाच्या प्रश्नावरून मतदानांवर बहिष्कार घातला आहे. बीड जिल्ह्यातील केज तालुक्यातील कोरडेवाडी गावात 2 हजार 130 मतदार आहेत. साठवण तलावाचा प्रश्न मार्गी लावा तरच मतदान करणार, असा ग्रामस्थांचा पवित्रा आहे.
