अहमदनगर। नगर सहयाद्री-
धारदार शस्त्राचा धाक दाखवून सावेडी आणि परिसरात दहशत माजविणारी कोयता गँगला तोफखाना पोलिसांच्या गुन्हे शोध पथकाने बेड्या ठोकल्या आहे.
अमोल गोपीनाथ गायकवाड (वय २६ रा. गऊखेल ता. आष्टी जि. बीड, हल्ली रा. तपोवनरस्ता, सावेडी), रोहीत रमेश औटे (वय २० रा. पिंपरखेड ता. आष्टी जि. बीड, हल्ली रा. पोखर्डी ता. नगर), विकास सदाशिव दिवटे (रा. गाडेकर चौक, निर्मलनगर, सावेडी) अशी गँगमधील पकडलेल्या तिघांची नावे आहेत.
तोफखाना हद्दीत मकरसंक्रांतीच्या अनुषंगाने गस्त घालीत असताना सपकाळ चौकात काही इसम दारूच्या नशेत संशयीतरित्या शस्त्रे घेऊन फिरत असल्याची माहिती पोलिसांना मिळाली.पथकाने सदर चौकात जाऊन पाहणी केली असता त्यांना तीन इसम संशयीतरित्या फिरताना मिळून आले.
पंचासमक्ष त्यांची झडती घेतली असता त्यांच्याकडून दोन कोयते व दुचाकी असा २५ हजारांचा मुद्देमाल जप्त करण्यात आला असून पोलीस ठाण्यात आर्म अ‍ॅक्ट कलमान्वये गुन्हा दाखल करण्यात आला आहे.
