बारामती । नगर सहयाद्री-
राष्ट्रवादी अजित पवार गटाचे, पारनेरचे आमदार निलेश लंके हे आज राष्ट्रवादी शरद पवार गटात प्रवेश करणार असल्याची चर्चा होत आहे. यावर बारामतीत माध्यमांशी बोलताना उपमुख्यमंत्री अजित पवार यांनी पहिली प्रतिक्रिया दिली.
राजकारणात कुणालाही कुठेही जाता येतं. वास्तविक नीलेश लंकेला पक्षात मी आणलं. त्याला मनापासून आधार मी दिला. आताही विकासकामांसाठी नीलेशला मोठ्या प्रमाणावर मदत मी केलेली आहे, नीलेश पारनेरपुरता लोकप्रिय आहे. पण बाकीच्या मतदारसंघात त्याला वाटतं तितकं सोपं नाही असे उपमुख्यमंत्री अजित पवार म्हणाले.
अजित पवार पुढे म्हणाले, कालच नीलेश माझ्याकडे आला होता. मी नीलेश सोबत चर्चा केली. त्याला काही गोष्टी समजून सांगितल्या. पण काही लोकांनी त्याच्या मनात हवा घातली आहे की, तू खासदार होशील म्हणून पण वास्तव तसं नाहीये. नीलेश पारनेरपुरता लोकप्रिय आहे.
पण बाकीच्या मतदारसंघात त्याला वाटतं तितकं सोपं नाही. मी त्याला सांगितलं होतं, तू तशा पद्धतीने वागू नको. जितकं समजून सांगणं गरजेचं आहे. तितकं मी केलेलं आहे. आता त्याचा निर्णय, असं अजित पवार म्हणाले.
