अ.नगर । नगर सहयाद्री:-
गेल्या तीन ते चार महिन्यांपासून राज्यासह देशभरात चर्चेत असलेली निलंबित आयएएस अधिकारी पूजा खेडकरच्या वडिलांनी आता येणारी विधानसभा निवडणूक लढवणार असल्याची माहिती समोर आली आहे. पूजाचे वडील दिलीप खेडकर यांनी याबाबतची माहिती दिली आहे. ते अहिल्यानगर जिल्ह्यातील शेवगाव-पाथड मतदारसंघातून विधानसभेसाठी नशीब आजमावणार आहेत.
वादग्रस्त सनदी अधिकारी पूजा खेडकरचे वडील माजी सनदी अधिकारी दिलीप खेडकर यांनी पुन्हा एकदा निवडणूक रिंगणात उतरण्याची तयारी सुरु केली आहे. शेवगाव-पाथड विधानसभा मतदार संघातून ते निवडणुकीची तयारी करत असल्याची माहिती त्यांनी दिली.
लोकसभा निवडणुकीत जरी माझा पराभव झालेला असला तरी प्रस्थापीतांना त्यांचा पराभव माझ्यामुळे झाला असल्याच वाटत आहे आणि त्यामुळे वेगवेगळ्या पद्धतीने मला व माझ्या कुटुंबीयांना त्रास देण्याचा प्रयत्न झाला. त्यामुळे मला जरी राजकारणातून संपविण्याचा प्रयत्न करण्यात आला असला तरी मी विधानसभेची निवडणूक लढवणार असल्याचे दिलीप खेडकर म्हणाले.
