नगर सह्याद्री / मुंबई : राष्ट्रवादीचे आ. एकनाथ खडसे यांना हृदविकाराचा झटका आला होता. त्यांना तातडीने जळगाव येथील खासगी रुग्णालयात उपचारासाठी दाखल करण्यात आले.
त्यानंतर त्यांना मुंबईत न्यावे लागले. यासाठी मुख्यमंत्री एकनाथ शिंदे यांनी एअर अॅम्ब्युलन्सची व्यवस्था केली. एकनाथ खडसे यांची प्रकृती आता व्यवस्थित झाली आहे. मुख्यमंत्री शिंदे यांनी वेळीच मदत केल्याबद्दल त्यांनी त्यांचे आभार मानले. जर तुमचे विमान वेळेवर टेक ऑफ झाले नसते तर माझ्या आयुष्याचे विमान कधीच लँड झाले नसते, असे खडसे म्हणाले.
म्हणजेच मुख्यमंत्री एकनाथ शिंदे नसते तर मी जिवंत राहिलो नसतो असं त्यांना सुचवायचं होत. यातून त्यांनी त्यांचे आभार मानले आहेत.
एकनाथ खडसे यांनी यावेळी घडलेला संपूर्ण प्रकार शिंदे यांना सांगितला. तसंच आता प्रकृती ठीक असल्याचंही कळवलं. “आपण वेळेवर मदतीला धावून आलात. मदत करने वाला बडा होता है. तुम्ही तातडीनं एअर अॅम्ब्युलन्स पाठवल्याबद्दल तुमचे मनापासून आभार, आपलं विमान जर वेळेवर आलं नसतं तर आमच्या आयुष्याचं विमान लँड झालं नसतं”, असं खडसे म्हणाले.
मुख्यमंत्री एकनाथ शिंदे यांनी खडसे यांची विचारपूस करत काळजी घ्या असं म्हटलं आहे. बॉम्बे हॉस्पिटलमध्ये खडसे यांच्यावर अँजिओप्लास्टीची शस्त्रक्रिया पार पडली आहे. डॉक्टरांनी शॉक ट्रीटमेंट देऊन बंद पडलेल हृदय पुन्हा सुरू केलं.
