नगर सहयाद्री टीम-
रोजच्या दगदगीच्या आयुष्यात स्वतःच्या त्वचेची काळजी घेणं अगदी गरजेचं होऊन बसतं. दिवाळी बरोबर लग्नसराईला लवकरच सुरूवात होत आहे. त्यामुळे विवाहेच्छुकांच्या प्रयत्नांना वेग आला असणार आहे. यात आकर्षक पेहरावाबरोबर सुंदर दिसणेही गरजेचं ठरतं. त्यादृष्टीने सौंदर्यप्रसाधनांच्या वापरावर भर दिला जातो. अशा वेळी घरच्या घरी देखील तुम्ही ‘होममेड स्क्रब’ च्या सहाय्याने तुम्ही सौंदर्य उजळवू शकता. चला तर आपला खिसा आणि त्वचा दोन्हीला आवडतील अशा फेसपॅक बाबत जाणुन घेवुया…
ऑरेंज स्क्रब
हनी अँड ऑरेंज स्क्रब तयार करण्यासाठी संत्र्याच्या सुकवलेल्या सालीची दोन टेबलस्पून पावडर आणि तितकेच ओट्स घ्या. यात मध घाला. जाडसर मिश्रण तयार करा. चेहऱ्यावर लावा. पाच मिनिटांनी धुवून टाका.
टोमॅटो स्क्रब
ओट्स आणि टोमॅटो स्क्रब तयार करण्यासाठी थोडे ओट्स घ्या. पिठीसाखर आणि पिकलेले टोमॅटो घ्या. टोमॅटोचे मोठे तुकडे करा. एका तुकड्यात ओट्स आणि साखर भरा. हा टोमॅटो चेहऱ्यावर घासा. पाच ते सात मिनिटांनी चेहरा धुवा.
बनाना स्क्रब
बनाना स्क्रब तयार करण्यासाठी दोन पिकलेली केळी कुस्करून घ्या. त्यात साखर घाला. यात चमचाभर मध घाला. हे मिश्रण चेहऱ्यावर लावा आणि धुवून टाका.
लेमन स्क्रब
हातापायांसाठी तुम्ही लेमन स्क्रब तयार करू शकता. हे स्क्रब चेहऱ्याला लाऊ नका. हे स्क्रब तयार करण्यासाठी अर्धं लिंबू घ्या. हे लिंबू साखरेत बुडवा आणि हातापायांवरून फिरवा. पाच ते सात मिनिटांनी गरम पाण्याने धुवून टाका.
पपईचं स्क्रब
पपईचं स्क्रब तयार करण्यासाठी अर्धा कप पिकलेली पपई घ्या. पपई कुस्करून त्यात दूध घाला. हळू-हळू सर्व मिश्रण ढवळा आणि त्याची पेस्ट करा. मग ती पेस्ट चेहऱ्यावर लावा. दहा ते पंधरा मिनिटांनी थंड पाण्याने धुवा. आणि मग तुमच्या चेहऱ्यावर आलेलं तेज काही आगळंच असेल.