पुणे । नगर सहयाद्री
भाजपचे खडकवासला मतदारसंघाचे आमदार भीमराव तापकीर यांच्या घरात घुसण्याचा प्रयत्न करणाऱ्या एका व्यक्तीला पोलिसांनी अटक केली आहे. आरोपीने भीमराव यांच्या घरात घुसण्याचा प्रयत्न केला. तसेच पोलीस कर्मचाऱ्याला शिवीगाळ करत मारहाण करण्याची धमकी दिली. या प्रकारानंतर आमदार भीमराव तापकीर यांनी थेट पुणे पोलिस आयुक्तांना पत्र लिहून परिस्थितीची माहिती दिली.
त्यानंतर सहकारनगर पोलीस ठाण्यात आरोपीविरुद्ध गुन्हा दाखल करत अटक करण्यात आली आहे. शंकर सर्जेराव धुमाळ (वय ४७) असे अटक करण्यात आलेल्या व्यक्तीचे नाव आहे. आरोपींनी आमदार तपकिर यांच्या घरात तीन वेळा घुसण्याचा प्रयत्न केला.
यावेळी त्याला रोखण्याचा पुरेपूर प्रयत्न सुरक्षारक्षकाने केला. मात्र, त्याने पोलीस कर्मचाऱ्याला शिवीगाळ करीत मारहाण करण्याचा प्रयत्न केला होता. पोलिसांनी आरोपीला बुधवारी अटक केली असून, त्याच्याविरोधात गुन्हा दाखल केला आहे. अधिक तपास सहकारनगर पोलिस करत आहे.
