आमदार जगताप यांनी दिली माहिती / केंद्रीय मंत्री चिराग पासवान, पालकमंत्री राधाकृष्ण विखे पाटील यांची प्रमुख उपस्थिती
अहिल्यानगर । नगर सहयाद्री:-
अहिल्यानगर शहरातील मार्केट यार्ड चौक येथील भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे अनावरण दिनांक 10 एप्रिल 2025 रोजी केंद्रीय मंत्री चिराग पासवान यांच्या हस्ते आणि पालकमंत्री राधाकृष्ण विखे पाटील यांच्या अध्यक्षतेखाली संपन्न होणार आहे. यावेळी महायुतीचे प्रमुख नेते उपस्थित राहणार आहे. दिल्ली येथील सर्वोच्च न्यायालयाच्या आवारात बसविण्यात आलेल्या भारतरत्न डॉ. बाबासाहेब आंबेडकर यांच्या पुतळ्याची प्रतिकृती नगरमध्ये बसवण्यात येत आहे. हा देशातील दुसरा पुतळा आहे अशी माहिती आमदार संग्राम जगताप यांनी दिली.
यावेळी जेष्ठ नेते संभाजी भिंगारदिवे, सुरेश बनसोडे, अजय साळवे, सुमेध गायकवाड, रोहित आव्हाड, किरण दाभाडे, सुनील क्षेत्रे, सुनील शिंदे, प्रशांत गायकवाड, कौशल गायकवाड, प्रा. जयंत गायकवाड, विशाल गायकवाड, विशाल भिंगारदिवे, संजय जगताप, सिद्धार्थ आढाव, विजय गायकवाड, गौतमीताई भिंगारदिवे आदी उपस्थित होते.
डॉ. बाबासाहेब आंबेडकर यांच्या पूर्णाकृती पुतळा उभारणीत संसद भवनची थीम वापरण्यात आली आहे. पुतळा अनावरण 10 एप्रिल 2025 रोजी सायंकाळी पाच वाजता होणार असून याप्रसंगी प्रसिद्ध गायक आनंद शिंदे यांचा गायनाचा कार्यक्रम होणार आहे. पूर्णाकृती पुतळ्याचे अनावरण झाल्यानंतर पुतळा पाहण्यासाठी अहिल्यानगरमध्ये येणाऱ्यांची संख्या वाढणार आहे. त्यामुळे येणाऱ्या पर्यटकांच्या सोयीसाठी आंबेडकर स्मारक भवनचे नुतनीकरण करण्यात येणार असल्याचे आ. जगताप यांनी सांगितले.
शहराच्या विकासात भर पडणार
गेल्या 30 ते 35 वर्षांपासून अहिल्यानगर शहरात महामानव डॉ. बाबासाहेब आंबेडकर यांचा पुर्णाकृती पुतळा बसविण्यात यावा अशी आंबेडकरी समाज बांधवांची मागणी होती. आता ती मागणी पूर्ण होत आहे. संविधानाचा उपयोग सर्वसामान्य जनतेचे प्रश्न सोडविण्यासाठी होत असतो. भारतरत्न डॉ. बाबासाहेब आंबेडकर यांच्या पुतळ्याच्या माध्यमातून विचारांचा वारसा पुढे घेऊन जाण्यास मदत होत असून शहराच्या वैभवात देखील भर पडणार असल्याचे आमदार संग्राम जगताप यांनी सांगितले.
पुतळ्याची उंची 28 फूट
मार्केट यार्ड चौकात महामानव डॉ. बाबासाहेब आंबेडकर यांचा भव्य पुर्णाकृती पुतळ्याचे अनावरण 10 एप्रिल रोजी होणार आहे. पुतळ्याचा चौथरा 18 फूट असून पुतळा 10 फूट उंच आहे. पुतळ्यासाठी 16. 79 लाख रुपये तर सुशोभिकरणासाठी 55.76 लाख रुपये खर्च करण्यात आला आहे. पुतळा मुतकार नवीन शेगमवाड यांनी बनवला आहे.
