Maharashtra Crime News: अघोरी प्रकार घडल्याची धक्कादायक घटना उघडकीस आली आहे. राष्ट्रवादी काँग्रेसचे नेते आणि पुण्याचे माजी महापौर दत्ता धनकवडे यांच्या बंगल्यासमोर हा प्रकार घडला असून, त्यामुळे शहरात खळबळ उडाली आहे. घटना २९ मार्च रोजी अमावस्येच्या दिवशी रात्री सुमारे आठ वाजण्याच्या सुमारास पुण्यातील धनकवडी परिसरात घडली. याच परिसरात राष्ट्रवादी काँग्रेसचे नेते आणि उपमुख्यमंत्री अजित पवार यांचे निकटवर्तीय मानले जाणारे दत्ता धनकवडे राहतात.
त्यांच्या बंगल्याच्या समोरच्या बाजूस काही संशयास्पद वस्तू आढळून आल्या. या वस्तूंमध्ये नारळ, दहीभात, उकडलेली अंडी, लिंबू आणि काळा बुक्का किंवा अगीर यांसारख्या साहित्याचा समावेश होता, जे सामान्यतः काळ्या जादूच्या किंवा अघोरी विधींसाठी वापरले जात असल्याचे म्हटले जाते. एका प्रमुख राजकीय नेत्याच्या घरासमोर अशा प्रकारे जादूटोण्याचे साहित्य आढळून आल्याने परिसरात चिंता आणि भीतीचे वातावरण निर्माण झाले.
हा प्रकार स्थानिक लोकांच्या निदर्शनास आल्यानंतर त्यांनी तात्काळ पाहणी केली असता, धानका काकासाहेब चव्हाण नावाची एक महिला तिथे हे कृत्य करत असल्याचे त्यांना आढळले. उपस्थितांनी तिला पकडून पोलिसांच्या स्वाधीन केले. प्राथमिक माहितीत असेही समोर आले आहे की, ही महिला गेल्या चार महिन्यांपासून अमावस्येच्या दिवशी धनकवडी परिसरातील वेगवेगळ्या ठिकाणी, लोकांच्या घरांसमोर अशाच प्रकारे अघोरी विधी करत होती.
पोलिसांनी संशयित महिलेला ताब्यात घेतले असून, तिची कसून चौकशी सुरू केली आहे. तिने हे कृत्य का केले? यामागे तिचा नेमका उद्देश काय होता? आणि सर्वात महत्त्वाचे म्हणजे, हे कृत्य करण्यासाठी तिला कोणी सांगितले होते का?. या प्रश्नांची उत्तरे शोधण्याचा पोलीस प्रयत्न करत आहेत. या चौकशीतून आणखी काही धक्कादायक माहिती समोर येण्याची शक्यता नाकारता येत नाही. या घटनेने सुसंस्कृत आणि आधुनिक शहर म्हणून ओळखल्या जाणाऱ्या पुण्यात अघोरी प्रकारांचे अस्तित्व अजूनही आहे का, हा प्रश्न निर्माण केला आहे.
