कोल्हापूर / नगर सह्याद्री : सध्या आरक्षण हा मुद्दा चांगलाच गाजत आहे. मराठा समाजाने आरक्षण मागणीसाठी अनेक आंदोलने केली. परंतु आता आता या मुद्द्यावरून जरांगे पाटील आणि ओबीसी समाजाचे नेते आमने-सामने आले आहेत.
मंत्री छगन भुजबळ यांनी या विषयावरून आक्रमक भूमिका घेतली आहे. आज जालना जिल्ह्यातील अंबड येथे मोठी सभा घेऊन त्यांनी एल्गार देखील केला. परंतु आता या वादात संभाजीराजे छत्रपती यांनी उडी घेतली आहे. छगन भुजबळ हे राज्याचे सामाजिक स्वास्थ्य बिघडवण्याचे काम करत आहेत.
त्यांची राज्य मंत्रिमंडळातून हकालपट्टी करावी अशी मागणी केली आहे. फेसबूकवर लिहिलेल्या आपल्या पोस्टमध्ये संभाजी राजे छत्रपती यांनी म्हटलं हे की – भुजबळ हे राज्याचे सामाजिक स्वास्थ्य बिघडवण्याचे काम करत आहेत.
सर्वसामान्य ओबीसी बांधवांचा मराठा समाजास कोणताही विरोध नसताना केवळ आपले राजकीय स्थान टिकवण्यासाठी दोन समाजांत नसलेली भांडणं लावण्याचं पाप करत आहेत.
सरकारमधील एक मंत्री उघडपणे वेगळी भूमिका घेऊन जातीय तेढ निर्माण करत असेल तर सरकारची देखील हीच भूमिका आहे का ? हे स्पष्ट करावे अन्यथा छगन भुजबळ यांची मंत्री पदावरून हकालपट्टी करावी, अशी आक्रमक मागणी संभाजीराजे छत्रपती यांनी यावेळी केली.
