मुंबई : क्रिकेट विश्वातून एक मोठी बातमी आली आहे. महेंद्रसिंग धोनी याने चेन्नईचे कर्णधारपद सोडले आहे. त्यामुळे आता चेन्नईचा नवा कर्णधार ऋतुराज गायकवाडला बनवण्यात आले आहे. आयपीएलने आपल्या अधिकृत सोशल मीडिया अकाउंटवरून ही माहिती दिली असल्याने आगामी आयपीएलच्या तोंडावर धोनीच्या चाहत्यांसाठी ही धक्कादायक बातमी आली आहे.
22 मार्चपासून सुरू होणाऱ्या आयपीएलच्या 17व्या हंगामाचा पहिला सामना शुक्रवारी सीएसकेचा आरसीबीविरुद्ध होणार आहे. सीएसकेला पाच वेळा आयपीएलचे विजेतेपद मिळवून देणारा महेंद्रसिंग धोनी आगामी हंगामात संघाचे नेतृत्व करताना दिसणार नाही. धोनीने ही जबाबदारी सोडण्याची ही पहिलीच वेळ नाही. यापूर्वी आयपीएल 2022 मध्येही संघ व्यवस्थापनाने कर्णधारपदात बदल केले होते.
धोनीच्या जागी स्टार अष्टपैलू रवींद्र जडेजाला कर्णधार बनवण्यात आले. मात्र, तो ही जबाबदारी नीट पार पाडू शकला नाही. त्यामुळे त्याने हंगामाच्या मध्यातच संघ सोडला आणि कर्णधारपदाचाही राजीनामा दिला. यानंतर धोनीने पुन्हा एकदा कर्णधारपदाची धुरा सांभाळली. गेल्या मोसमात संघाने पाचवे विजेतेपद पटकावले. आयपीएलने आज सर्व कर्णधार आणि ट्रॉफीसह फोटो ट्विटवर शेअर केला. या फोटोत अनेक प्रश्न उपस्थित झाले आहेत. चेन्नईचा कर्णधार महेंद्रसिंह धोनीच्या ऐवजी फोटोसेशनला ऋतुराज गायकवाडने उपस्थिती लावली.
