राहाता। नगर सहयाद्री
एकीकडे रांजणखोल परिसरातील ढोकचौळे यांच्या वस्तीवर बिबट्याने दहशत निर्माण केली असून लहान मुले संध्याकाळच्या सुमारास खेळत असताना अचानक बिबट्या मुलांसमोर आल्याने मुले घाबरून गेली होती. तर दुसरीकडे लोणी मधील गावालगत असणाऱ्या बळीनारायण रस्त्यावरील मेहेत्रे यांच्या घराच्या गेटमध्ये बिबट्याला बघून त्यांचा अठरा वर्षाचा मुलगा अथर्व बेशुद्ध पडल्याची घटना घडली आहे.
थोडक्यात चिमुकली बचावली
संध्याकाळच्या वेळेस मक्याच्या शेतात दबा धरून बसलेल्या बिबट्याला कोंबडी दिसली कोंबडीचा पाठलाग करताना बिबट्या अचानक खेळत असलेल्या लहान मुलांसमोर आला. बिबट्याला पाहून मुलं घाबरली मुले जोरात ओरडली त्यात एका मुलाने बिबट्याला पतंगदोराची आसरी फेकुन मारली व बिबट्या माघारी फिरत त्याने कोंबडीला पकडून पुन्हा मक्याच्या शेतात धूम ठोकली. बेळीच मुलांनी प्रसंगावधान दाखबले म्हणून मोठा अनर्थ टळला.
बिबट्याला बघून युवक बेशुद्ध
शुक्रवारी सायंकाळी सात वाजण्याच्या सुमारास लोणी बुद्रुक गावालगत बळीनारायन रस्त्यावरील सोमनाथ मेहेत्रे यांचा अठरा वर्षांचा मुलगा अथर्व घराच्या दारात उभा असताना बिबट्या समोर येऊन उभा राहिला. गेट बंद असल्याने तो वाचला मात्र बिबट्याला बघून तो जोरात ओरडला आणि तिथेच बेशुद्ध पडला.
