अहमदनगर । नगर सहयाद्री-
कल्याण निर्मळ राष्ट्रीय मार्गावरील करंजी घाटातील माणिकशहा पिरबाबा दर्गा जवळील धोकादायक वळणावर रविवारी एका वीस फूट खोल दरीत अंदाजे 35 वर्षांच्या अज्ञात पुरुषाचा अर्धवट जळालेला मृतदेह आढळून आल्याने एकच खळबळ उडाली आहे.
करंजी घाटात एक पुरुषाचा मृतदेह बेवारसपणे पडलेला असल्याची माहिती पाथर्डी पोलीस स्टेशनचे पोलीस निरीक्षक संतोष मुटकुळे यांना मिळाल्यानंतर त्यांनी पोलीस उपधीक्षक सुनील पाटील, उपनिरीक्षक लिमकर, जगदीश मुलगीर, विलास जाधव आणि करंजी पोलीस चौकीचे हवालदार दळवी, कुसळकर, बेरड, बुचकूल यांच्यासह तात्काळ घटनास्थळी दाखल झाले.
दुपारी एक वाजता मृतदेह खोल दरीतून वर काढण्यात आला. या अज्ञात व्यक्तीचा मृतदेह अर्धवट जळालेल्या अवस्थेत आढळला. हा घातपाताचा प्रकार आहे की नाही, याची तपासणी पोलीस करत आहेत. या प्रकरणासंदर्भात पाथर्डी पोलिसात गुन्हा नोंदवण्याचे काम सुरू आहे. करंजी घाटात अर्धवट जळालेल्या अवस्थेतील पुरुषाचा मृतदेह आढळल्याने प्रवाशांमध्ये भीतीचे वातावरण निर्माण झाले आहे.
