अहमदनगर / नगर सह्याद्री : अहमदनगरमधील चोरट्यांचा उपद्रव काही कमी होताना दिसत नाही. मागील काही घटना ताजा असतानाच आता आणखीएक बातमी समोर आली आहे.
नगर तालुक्यातील हिंगे वस्ती येथे सात ते आठ दरोडेखोरांनी शुक्रवारी रात्री अडीच वाजता धुमाकूळ घातल्याची घटना घडली आहे. जनार्धन संभाजी हिंगे (वय 37, रा. वाळुंज) यांच्या मुलांच्या गळ्याला चाकू लावून व इतर व्यक्तींना मारहाण करून साडेतीन लाख रुपये रोख व दागिने असा 7 लाख रुपयांचा ऐवज चोरटयांनी लुटून नेला.
अधिक माहिती अशी : हिंगे कुटुंबीय घरात झोपलेले होते. मध्यरात्री चोरट्यांनी घराचा दरवाजा तोडून घरात प्रवेश केला. कुटुंबातील सदस्यांवर हल्ला करण्यात आला आणि त्यांच्या मुलाच्या गळ्यावर चाकू लावून धमकावले.
आरोपींनी १४.६ तोळे सोन्याचे दागिने आणि साडेतीन लाख रुपयांची रोकड लंपास केली. घटनेची माहिती मिळताच तालुका पोलिस ठाण्याचे प्रभारी तथा सहाय्यक पोलिस निरीक्षक शिशिरकुमार देशमुख, पोलिस उपनिरीक्षक रणजीत मारग यांनी आपल्या पथकासह घटनास्थळी धाव घेतली.
