पारनेर / नगर सह्याद्री : पारनेर तालुक्यातील वडगाव सावताळ येथील पवार कुंटुंबियांच्या मोटार सायकलला कंटेनरने जोराची धडक दिली. त्यामुळे एकाच कुटुंबातील चौघांचा जागीच मृत्यू झाला.
दुसऱ्या मोटरसायकलवरील एक जखमी आहे. या अपघातात शेतमजूर अनिल बाळासाहेब पवार (वय २८), सोनाली अनिल पवार (वय २२), माउली अनिल पवार (वय ११) व एक सहा महिन्यांची मुलगी (सर्व रा.वडगाव सावताळ ता.पारनेर) यांचा मृत्यू झाला आहे.
याबाबत सविस्तर माहिती अशी, इमामपूर घाटाच्या तीव्र उतारावरून छत्रपती संभाजी नगर कडे जाणाऱ्या कंटेनरने पुढे चाललेल्या दोन दुचाकींना पाठीमागून धडक दिली. यात एकाच दुचाकी वरील चौघांचा मृत्यू झाला. दुसऱ्या दुचाकीवरील भगवान आव्हाड (रा.पांगरमल, ता.नगर) हे जखमी झाले.
अपघातानंतर कंटेनर चालक फरार झाला. घटनेची माहिती समजताच, पोलिसांनी घटनास्थळी धाव घेतले. वडगाव सावताळ येथील एकाच कुटुंबातील चौघांचा मृत्यू झाल्याने गावावर दुःखाची छाया पसरली आहे.
