अहमदनगर / नगर सह्याद्री : नगर तालुक्यात क्रिकेटची मोठी क्रेझ आहे. अनेक टूर्नामेंट मॅच तालुक्यात सुरु असतात. त्यामुळे या क्रीडाप्रेमींसाठी लवकरच निंबळक याठिकाणी एक कोटी रुपये किंमतीचे ग्रीन हिल स्टेडियम आपण उभारू अशी घोषणा आ. नीलेश लंके यांनी केली.
कै. संजय लामखडे व कै. विलासराव लामखडे यांच्या स्मृतिप्रीत्यर्थ लेदर बॉल क्रिकेट स्पर्धेचे आयोजन करण्यात आले होते. नगर तालुक्यातील निंबळक येथे याचे आयोजन होते.
या स्पर्धच्या उद्घाटन प्रसंगी आ. लंके यांनी वरील घोषणा केली. दोस्ती क्रिकेट क्लबतर्फे गेल्या ३०-३५ वर्षांपासून निंबळक येथे दिवाळीत क्रिकेट स्पर्धेचे आयोजन केले जाते. येथील मैदान खेळाडूंसाठी चांगले आहे. या स्पर्धेत जिल्हाभरातून संघ सहभागी होतात. खेळाडूंची गैरसोय होत असल्याने अजय लामखडे यांनी येथे स्टेडियमची मागणी केली होती.
या स्टेडियमसाठी एक कोटी रुपयांचा निधी मंजूर करण्यात आला आहे. स्टेडियमच्या बांधकामाला लवकरच सुरुवात होणार आहे असेही आ. लंके यांनी सांगितले.
निंबळक येथील क्रिकेट स्पर्धात 60 संघानी सहभाग घेतला आहे. या स्पधेत प्रथम क्रमांक मिळवणार्‍या संघाला 55 हजार 555 रुपयांचे रोख व चषक, उपविजेतेपद मिळवणार्‍या संघाला 44 हजार 444 रुपयांचे रोख व चषक असे बक्षीस देण्यात येणार आहे.
