सुपा / नगर सह्याद्री
पारनेर तालुक्यातील वाळवणे ते रुईछ्त्रपती रस्त्याची अत्यंत दुरावस्था झाली आहे. रस्त्यात मोठ मोठे खड्डे पडले आहेत. या खड्ड्यांमुळे नागरिकांना प्रवास करताना अत्यंत त्रास होत आहे. या समस्येकडे लक्ष द्यायला ना पुढाऱ्यांना वेळ आहे ना बांधकाम विभागाला. येथील नेतेमंडळी फक्त मतदाना पुरताच आमचा वापर करून घेत आहेत असा आरोप येथील नागरिकांनी केला.
रुईछ्त्रपती येथे प्राथमिक आरोग्य केंद्राचे उपकेंद्र आहे. या आरोग्य केंद्रात उपचार घेण्यासाठी नागरिक, वृद्ध, शाळेतील विद्यार्थ्यांना दररोज प्रवास करावा लागतो. शेतकऱ्यांना त्यांचा माल मुख्य बाजारपेठ असलेल्या सुपा, पारनेर, अहमदनगर, पुणे येथे घेऊन जाण्यासाठी तसेच दुग्ध व्यावसायिक, कंपनी कामगार आदींची या रस्त्यावर म़ोठ्या प्रमाणात वर्दळ असते. रस्त्यावर खड्डे पडले असल्यामुळे वाहनांचेही मोठ्या प्रमाणात नुकसान होत असून मणकादुखी, पाठदुखी असे आजार उद्भवू लागले आहेत.
मध्यंतरी झालेल्या पावसामुळे पठारे वस्ती ते रूईछत्रपती फाटा या एक किलोमीटर अंतर असलेल्या रस्त्यावर मोठ मोठे खड्डे पडले आहेत. खड्ड्यांमुळे वाहनचालकांना मोठी कसरत करावी लागत आहे. या रस्त्यावर पायी चालणे देखील अवघड झाले आहे. खड्ड्यांचा अंदाज न आल्यामुळे अनेक दुचाकी स्वार घसरून पडले आहेत.
अनेक छोटे मोठे अपघात देखील याठिकाणी झाले आहेत. त्यामुळे रस्त्यावर पडलेले खड्डे तातडीने बुजवावेत अशी मागणी रुईछ्त्रपतीचे सरपंच डॉ. मच्छिंद्रनाथ दिवटे, वाळवणेचे सरपंच संगीता गोरक्षनाथ दरेकर आदींसह ग्रामस्थांनी केली आहे.
