अहमदनगर / नगरसह्याद्री : अहमदनगर जिल्ह्याला हादरवणारी एक धक्कादायक घटना घडली आहे. कारखाली चिरडून आईसह मुलाला ठार मारल्याची खळबळजनक घटना घडली आहे. ही घटना पारनेर शहरात घडली आहे.
शीतल अजित येणारे (२७), स्वराज येणारे (वय अडीच वर्षे) अशी मृतांची नावे असून किरण राजाराम श्रीमंदिलकर असे आरोपींची नावे आहेत. गुरुवारी (२३ नोव्हेंबर) सायंकाळी सात वाजता ही घटना घडली.
मृत महिलेची सासू चंद्रकला शिवाजी येणारे हिने पोलिसात धाव घेत किरण राजाराम श्रीमंदिलकर याच्या विरोधात फिर्याद दिली. आरोपी सध्या फरार झाला आहे. अधिक माहिती अशी : फिर्यादीत म्हटल्याप्रमाणे, श्रीमंदिलकर व येणारे कुटुंब शेजारी शेजारी राहत असून घराशेजारच्या जागेच्या मोजणीतून दोन्ही कुटुंबात भांडणारे होत होती.
किरण श्रीमंदिलकर हा येणारे कुटुंबाला नेहमी जिवे मारण्याची धमकी देत होता. दरम्यान गुरुवारी सायंकाळी शीतल आपला अडीच वर्षांचा मुलगा स्वराजला जेवण भरवत बाहेर घरासमोर बसल्या होत्या. त्याच वेळी आरोपी आपल्या कार ने तेथे आला.
त्याने शीतल व स्वराज यांच्या अंगावर कार घातली. आवाज ऐकून शीतलच्या सासू चंद्रकला घराबाहेर आल्या. त्यांना समोर शीतल व स्वराज रक्ताच्या थारोळ्यात पडलेले दिसले. आरडाओरड ऐकून परिसरातील लोकांनी तिकडे धाव घेत जखमी शीतल व स्वराज यांना गाडीखालून बाहेर काढले.
तेथील डॉक्टरांनी परिस्थिती पाहता उपचारासाठी नगरला हलवण्याचा सल्ला दिला. शीतलला नगर येथील शासकीय रुग्णालयात तर स्वराजला विळद घाटातील विखे पाटील रुग्णालयात दाखल केले. परंतु उपचारादरम्यान शीतलचा गुरुवारी रात्री ९ वाजता, तर स्वराजचा मध्यरात्री एक वाजता मृत्यू झाला.
