अहिल्यानगर । नगर सहयाद्री:-
जिल्ह्यासह राज्यातील विविध भागांत तापमानाचा घसरला आहे. त्यामुळे नागरिक चांगलेच गारठले आहे. नगर शहरातील अनेक भागांत शेकोट्या पेटल्या असून ऊबदार कपडे वापरून लोक थंडीपासून बचाव करीत आहेत. तसेच सकाळच्या थंडीतही लोक फिरण्यासाठी घराबाहेर पडत आहेत.
यंदा दिवाळी झाल्यानंतर थंडीला हळूहळू सुरुवात झाली. त्यानंतर नोव्हेंबरच्या अखेरीस तापमानात दररोज घट होतांना दिसत आहे. भारतीय हवामानशास्त्र विभागाच्या संकेतस्थळावर मंगळवारी अहिल्यानगरचे तापमान ९.७ अंश इतके नोंदले गेले. शहरात सहाच्या सुमारास अंधार पडत असून, यानंतर थंडीचा तडाखा वाढत आहे. त्यामुळे एरव्ही रात्री बारापर्यंत असणारी रस्त्यावरील वर्दळ आता रात्री नऊच्या आतच कमी होताना दिसते आहे.
थंडीच्या कडाक्यापासून वाचण्यासाठी नागरिक स्वेटर, मफलर यासह गरम कपडे वापरत आहेत. अनेक ठिकाणी सकाळी व संध्याकाळी शेकोटी पेटल्याचे दिसत आहे. पुढील काळामध्ये राज्यात अनके भागांतील तापमानात चढ-उतार पाहायला मिळणार आहे. राज्यात हवेचा दाब निर्माण झाल्याने थंडीत चढ-उतार होत आहे. तसेच थंडी वाढेल, असाही अंदाज हवामान विभागाने व्यक्त केला आहे.
