अहिल्यानगर । नगर सहयाद्री
शहरातील सावेडी उपनगरातील भिस्तबाग परिसरात एका भाड्याच्या खोलीत महाविद्यालयीन युवतीवर धारदार शस्त्राने प्राणघातक हल्ला झाल्याची धक्कादायक घटना आज सकाळी घडली. गार्गी गणेश शिंदे (वय १६, रा. तपोवन रस्ता) असे जखमी युवतीचे नाव असून, तिची प्रकृती चिंताजनक आहे. या घटनेने शहरात खळबळ उडाली आहे.
मिळालेल्या माहितीनुसार, गार्गी ही पाऊलबुद्ध कॉलेजमध्ये शिक्षण घेत आहे. हल्लेखोराने तिला एका भाड्याच्या खोलीत नेऊन तिच्यावर हल्ला केला. घटनेची माहिती मिळताच तोफखाना पोलिसांनी तात्काळ घटनास्थळी धाव घेतली. खोलीत रक्ताचा सडा पडला होता. पोलिसांनी गंभीर जखमी गार्गीला तातडीने जिल्हा शासकीय रुग्णालयात दाखल केले. मात्र, प्रकृती गंभीर असल्याने तिला नातेवाईकांनी एका खासगी नोबेल रुग्णालयात हलवले असून, तिच्यावर तातडीची शस्त्रक्रिया सुरू आहे.
घटनेची माहिती मिळताच शहर पोलीस उपअधीक्षक डॉ. दिलीप टिपरसे व पोलीस निरीक्षक आनंद कोकरे यांनी रुग्णालयात जाऊन माहिती घेतली. आरोपी फरार झाला असून, तो एक सराईत गुन्हेगार असल्याचे समोर आले आहे. तो यापूर्वी खुनाच्या गुन्ह्यात जामिनावर बाहेर आला होता. त्याच्या शोधासाठी पोलीस निरीक्षक आनंद कोकरे यांच्या मार्गदर्शनाखाली दोन विशेष पथके रवाना करण्यात आली आहेत. हा हल्ला नेमका का झाला, याचे कारण अद्याप अस्पष्ट असून, ते गुलदस्त्यातच आहे. तोफखाना पोलीस गुन्हा दाखल करण्याची प्रक्रिया करत आहेत.
