अहमदनगर । नगर सहयाद्री-
नगर शहरातून बेकायदेशीर प्रवेश करणार्या जड वाहतुकीमुळे डीवायएसपी चौकात घडलेल्या अपघातात एका विद्यार्थ्याचा मृत्यू झाला आहे. शेख महंम्मद अनीस खलीद (वय १९ रा. सीआयव्ही कॉलनी, मुकुंदनगर) असे मृत विद्यार्थ्यांचे नाव आहे.
गुरूवारी (दि. २) सकाळी हा अपघात झाला. या प्रकरणी तोफखाना पोलीस ठाण्यात आकस्मात मृत्यूची नोंद केली आहे. शेख सायकलवरून जात असताना त्याला हायवा डंपरने धडक दिली.
पोलिसांनी डंपरसह चालकाला ताब्यात घेतले आहे. शेख महंम्मद अनीस खलीद हा शालेय विद्यार्थी शाळेतून घरी जात असताना डीवायएसपी चौकात १४ टायर डंपरने शेख यास उडवले.
अपघातात त्याचा जागीच मृत्यू झाला. या अपघातामुळे नगर शहरातील अवजड वाहतुकीचा प्रश्न पुन्हा एैरणीवर आला आहे. शहरात सर्व प्रकारच्या अवजड वाहनांना प्रवेश बंदी आहे.
नगर-सोलापूर महामार्गावरून नगरच्या दिशेने येणारी अवजड वाहने अरणगाव बाह्यवळण रस्त्याने, नगर-पुणे व नगर-कल्याण महामार्गावरील वाहने निंबळक बाह्यवळण रस्त्याने व नगर-मनमाड आणि नगर-संभाजीनगर महामार्गावरील अवजड वाहने वडगाव गुप्ता बाह्यवळण रस्त्याने वळवली आहेत.
त्या शिवाय इतर उपाय योजनाही केल्या आहेत. तरी देखील वाहतूक पोलिसांच्या दुर्लक्षतेमुळे जड वाहतूक सर्रासपणे शहरांत प्रवेश करत असून याला जबाबदार कोण असा प्रश्न उपस्थित होत आहे.
