अहमदनगर / नगर सहयाद्री : आदर्शगाव हिवरेबाजार येथील चाणकाईमाता मंदिराजवळील डोंगराला भीषण आग लागली. ही घटना बुधवारी (२० मार्च) रात्री १० वाजता घडली. परंतु ग्रामसुरक्षा यंत्रणेमुळे ही आग त्वरित आटोक्यात आल्याने मोठा अनर्थ टळला.
बुधवारी रात्री चाणकाईमाता मंदिराजवळील डोंगराला आग लागली. पद्मश्री पोपटराव पवार यांच्या मार्गदर्शनाखाली हिवरे बाजारमध्ये ग्रामसुरक्षा यंत्रणा कार्यन्वित आहे. त्यामुळे काही मिनिटातच मोठ्या प्रमाणावर ग्रामस्थ व तरुण मंडळ तसेच ग्रामवन समितीचे सदस्य घटनास्थळी आले.
त्यांच्या अथक प्रयत्नातून आग आटोक्यात आली व मोठा अनर्थ टळला. रात्री आग लागण्याची ही दुसरी वेळ असून यापूर्वी दिनांक ७ मार्च २०२४ रोजी देखील रात्रीच आग लागली होती. आगीत मोर, हरणे, ससे, लांडगे व इतर वन्यजीव आपला जीव वाचविण्यासाठी धावत होते. त्यावेळीद देखील काही वेळातच आग आटोक्यात आणली होती.
