LPG Cylinder Price: केंद्र सरकारने जुलै महिन्याच्या पहिल्याच दिवशी सर्वसामान्यांना मोठं गिफ्ट दिलं आहे. तेल विपणन कंपन्यांनी एलपीजी सिलिंडरच्या किंमतीत कपात केली आहे. एलपीजी सिलिंडर जवळपास ३१ रुपयांनी स्वस्त झाला आहे आणि नवीन दर आजपासून लागू करण्यात आले आहेत.
प्रत्येक महिन्याच्या पहिल्या तारखेला तेल कंपन्यांकडून इंधनाचे नवीन दर जारी केले जातात. जुलै महिन्याच्या पहिल्या दिवशी, १९ किलो वजनाचा व्यावसायिक सिलिंडर ३० ते ३१ रुपयांनी स्वस्त झाला आहे. मुंबईत व्यावसायिक सिलिंडरची किंमत आता १५९८ रुपये आहे. दिल्लीत १६४६ रुपये, चेन्नईमध्ये १८०९.५० रुपये, आणि कोलकातामध्ये १७५६ रुपये इतकी झाली आहे.
महत्त्वाची बाब म्हणजे, व्यावसायिक गॅस सिलिंडरच्या दरात सलग चौथ्या महिन्यात घट झाली आहे. या कालावधीत चारही महानगरांमध्ये व्यावसायिक गॅस सिलिंडर १५० रुपयांनी स्वस्त झाला आहे. मात्र, घरगुती गॅस सिलिंडरच्या दरात कोणताही बदल झालेला नाही. ९ मार्चपासून घरगुती गॅस सिलिंडरचे दर जैसे थे आहेत.
मुंबईत घरगुती गॅस सिलिंडरची किंमत सर्वात कमी ८०२.५० रुपये आहे. तज्ज्ञांच्या मते, केंद्र सरकारने गेल्या १० महिन्यांत घरगुती गॅस सिलिंडरच्या किमतीत जवळपास ३०० रुपयांनी कपात केली आहे. आगामी काळात घरगुती गॅस सिलिंडरच्या किमतीत कोणताही बदल अपेक्षित नाही, परंतु व्यावसायिक गॅस सिलिंडरच्या किमतीत आणखी घट होण्याची शक्यता आहे.
