मुंबई । नगर सहयाद्री:-
काँग्रेसला एक मोठा धक्का बसला आहे. देगलूर विधानसभा मतदारसंघातील आमदार जितेश अंतापूरकर यांनी आज आपल्या पक्ष सदस्यत्त्वाचा राजीनामा दिला आहे. आमदार जितेश अंतापूरकर भारतीय जनता पक्षात (भाजप) प्रवेश करण्याची शक्यता असल्याची चर्चा राजकीय वर्तुळात आहे.
गेल्या काही दिवसांपासून जितेश अंतापूरकर आणि काँग्रेसचे काही आमदार हायकमांडच्या रडारवर असल्याची चर्चा होती. विधानपरिषद आणि राज्यसभा निवडणुकीत काँग्रेस पक्षाची काही मतं फुटली होती. या आमदारांची नेमकी नावं समोर आली नव्हती. मात्र, क्रॉस व्होटिंग करणाऱ्या आमदारांमध्ये जितेश अंतापूरकर यांच्या नावाचा समावेश होता. त्यामुळे काही आमदार पक्षाची साथ सोडून महायुतीसोबत जातील, अशी चर्चा सातत्याने राजकीय वर्तुळात रंगली होती.
काही दिवसांपूर्वीच जितेश अंतापूरकर आणि हिरामण खोसकर यांनी सह्याद्री अतिथीगृहावर मुख्यमंत्री एकनाथ शिंदे यांची भेट घेतल्याची माहिती समोर आली होती. या भेटीविषयी जितेश अंतापूरकर यांना विचारण्यात आले असता मी माझ्या मतदारसंघातील शेतकऱ्यांच्या समस्यांविषयी चर्चा करण्यासाठी मुख्यमंत्री एकनाथ शिंदे यांना भेटल्याचे अंतापूरकर यांनी सांगीतले होते. मात्र, आता त्यांनी काँग्रेस पक्षातून राजीनामा दिल्याची माहिती समोर आली असून भाजपमध्ये प्रवेश करणार असल्याची चर्चा राजकीय वर्तुळात आहे.
