अहमदनगर । नगर सहयाद्री:-
सहा जणांच्या टोळक्याने युवकाला लाकडी दांडक्याने मारहाण केल्याची घटना वैदूवाडीत घडली. संकेत दत्ता शिंदे (वय २०, रा. वैदूवाडी, ठुबे हॉस्पिटल रस्ता, पुजा किराणा स्टोअर्सच्या शेजारी) असे मारहाण झालेल्या युवकाचे नाव आहे. त्याच्यावर जिल्हा शासकीय रुग्णालयात उपचार सुरू आहेत.
त्याने उपचारादरम्यान दिलेल्या जबाबावरून आदित्य काळू शिंदे, आशिष काळू शिंदे, रूपेश उर्फ बाबाजी बाबू शिंदे, काळू मारूती शिंदे, मिना काळू शिंदे, अंबादास मच्छिंद्र लोखंडे (सर्व रा. वैदूवाडी) यांच्या विरोधात तोफखाना पोलीस ठाण्यात गुन्हा दाखल करण्यात आला आहे.
अधिक माहिती अशी: सोमवारी (२४ जून) दुपारी साडेतीन ते चार वाजेच्या दरम्यान संकेत त्यांच्या घराबाहेर फोनवर बोलत असता तेथे आदित्य शिंदे हा आला व त्याने काही एक न विचारता लाथाबुक्क्यांनी मारहाण केली. तेवढ्यात तेथे आशिष शिंदे, रूपेश शिंदे, काळू शिंदे, मिना शिंदे व अंबादास लोखंडे हे सर्व आले. त्यांनी शेजारील टपरीतून लाकडी दांडके आणून संकेत यांना मारहाण केली. दगड फेकून मारून जखमी केले.
एका बोळीमध्ये ओढत नेले व तेथे पुन्हा मारहाण केली. संकेत यांना मारहाण होत असल्याचे पाहून एक जण सोडविण्यासाठी आला. तेव्हा मारहाण करणारे संकेत यांना जीवे मारण्याची धमकी देऊन पळून गेले असल्याचे फिर्यादीत म्हटले आहे. जखमी संकेत यांच्यावर उपचार सुरू असून त्यांनी दिलेल्या जबाबावरून बुधवारी (२६ जून) सकाळी गुन्हा दाखल करण्यात आला आहे.
