सातारा। नगर सहयाद्री-
पुण्यातील कल्याणीनगर येथे 19 मे रोजी झालेल्या अपघात प्रकरणाने एकच खळबळ उडाली होती. अल्पवयीन मुलाने पोर्शे गाडीने दोन जणांना चिरडले. याप्रकरणामुळे राज्यातील वातावरण देखील तापले होते. आता नशेत गाडी चालवून दोघांना चिरडणाऱ्या अल्पवयीन मुलाचा आजोबा सुरेंद्र अगरवालचा महाबळेश्वरमधील क्लबवर बुलडोझर चालवण्यात आला आहे.
मुख्यमंत्री एकनाथ शिंदे यांनी अनियमितता आढळल्यास बुलडोझर चालवण्याचे आदेश आठ दिवसांपूर्वी दिले होते. यानंतर आता सातारा जिल्हा प्रशासनाकडून कारवाई करण्यात आली आहे. सुरेंद्र अगरवालच्या मालकीच्या बारमध्ये नियमांचं उल्लंघन केल्याचं समोर आले होते.
त्यानंतर राज्य उत्पादन शुल्क विभागाने बार सुद्धा सील केला होता. आता महाबळेश्वर येथील एम पी जी क्लब नामक रिसॉर्ट सरकारी जमिनीवर बेकायदेशीर असल्याचे समोर आले आहे. त्यामुळे आज (शनिवारी) बुलडोझर फिरवण्यात आला आहे. रहिवाशी भाडेपट्टीवर असलेल्या या जागेचा वाणिज्य कारणासाठी वापर होत असल्याचे आढळून आले आहे.
