‘कोल्ड’ कॉफी शॉप चालकांना ‘तोफखाना’ पोलिसांचा ‘हॉट’ चटका
अहमदनगर। नगर सहयाद्री-
शहरात कॅफे शॉपच्या नावावर अनोखा कारभार सुरु असल्याचा धक्कादायक प्रकार समोर आला आहे. कॅफे शॉपच्या प्लायवूडच्या कंपार्टमेंटमध्ये काळे पडदे लावून मुला-मुलींना अश्लील चाळे करण्यासाठी जागा उपलब्ध करुन दिल्या प्रकरणी चालकांच्या विरोधात तोफखाना पोलिस ठाण्यात गुन्हा दाखल करण्यात आला आहे.
कॅफें शॉपमध्ये मुला-मुलींना बसण्यासाठी जागा उपलब्ध करुन देत असल्याची माहिती तोफखाना ठाण्याचे पोलिस निरीक्षक मधुकर साळवे यांना मिळाली होती. त्यानुसार त्यांच्या मार्गदर्शनाखाली तोफखाना पोलिसांच्या पथकाने कारवाई सुरु केली.
बालिकाश्रम रोडवरील डाऊन कॅफे, पारिजात चौकातील हंगरेला कॅफे, प्रेमदान चौकातील तारा पानशेजारील द व्हेनी कॅफे, पंपिंग स्टेशन रोड, ताठेनगर वनस्टार कॅफे येथे तीन बाय तीन लांबीचे व सुमारे पाच फूट उंचीचे प्लायवूडचे कंपार्टमेंट्स, त्याला बाहेरच्या बाजूने पडदे बसवलेले आढळून आले.
कारवाई दरम्यान काही मुले-मुली अश्लील चाळे करताना आढळले. त्यांना समज देत सोडून देण्यात आले असून फरहान शेख (रा. केडगाव), शक्ती सिंग (भिमा सकर, राजस्थान), विशाल पालवे (कोल्हार, पाथर्डी), रंजीज पंडित (इंदिरानगर, पुणे) व ओंकार ताठे (ताठेनगर, सावेडी) यांच्या विरोधात गुन्हे दाखल करण्यात आले आहे.
