नाशिक / नगर सहयाद्री : राजकीय पटलातून वारंवार विविध घडामोडी घडत आहेत. नवनवीन समीकरणे समोर येत आहेत. आता नाशिकमध्ये मोठ्या घडामोडी घडण्याच्या शक्यता आहेत.
साताऱ्याच्या बदल्यात नाशिक मतदारसंघ राष्ट्रवादी काँग्रेस अजित पवार गटाला देण्याच्या हालचाली सुरू आहेत. तेथून मंत्री छगन भुजबळ यांना तिकीट मिळू शकते. यासंदर्भात वरिष्ठ स्तरावर निर्णय झाला आहे. मुंबईत वरिष्ठ नेत्यांनी घेतलेल्या चर्चेतून ही माहिती पुढे आल्याचं विश्वसनीय सूत्रांनी सांगितलं आहे.
भारतीय जनता पक्षाने नाशिक मतदारसंघातून छगन भुजबळ यांनी भाजपच्या कमळ या चिन्हावर उमेदवारी करावी, असा प्रस्ताव दिला आहे. हा प्रस्ताव राष्ट्रवादी काँग्रेसचे नेते आणि उपमुख्यमंत्री अजित पवार यांनी फेटाळून लावला आहे, तर भुजबळ राष्ट्रवादी काँग्रेसच्या चिन्हावरच निवडणूक लढवतील, अशी भूमिका उपमुख्यमंत्री अजित पवार यांनी स्पष्ट केली आहे.
यासंदर्भात येत्या 48 तासांमध्ये दोन्ही घटक पक्ष चर्चा करून निर्णय घेतील, असा दावा करण्यात आला आहे. त्यामुळे मतदारसंघ, उमेदवार आणि निवडणुकीचे चिन्ह यासंदर्भात काय निर्णय होतो? याची उत्सुकता अनेकांना आहे.
