अहिल्यानगर | नगर सह्याद्री:-
विधानसभा निवडणुकीवेळी वारंवार मागणी करूनही पक्षाच्या वरिष्ठांनी, नेतृत्वाने आमची दाखल घेतली नाही. शहरात उमेदवारी दिली असती, तर चित्र वेगळे असते, शहरात पक्ष, कार्यकर्ते टिकले असते. आता आम्ही कुणासाठी व कशासाठी थांबायचे, असा सवाल करत शिवसेना ठाकरे गटाच्या नगरसेवकांनी संपर्क प्रमुख आमदार सुनील शिंदे यांना जाब विचारला. नगरसेवकांनी निर्णय घेतले आहेत, कुणीही थांबायच्या मानसिकतेत नाही, असेही नगरसेवकांनी स्पष्ट केले.
शहरातील ठाकरे गटातील जवळपास सर्वच नगरसेवक पक्ष सोडण्याच्या तयारीत आहे. तिघांनी मागील आठवड्यात शिवसेना शिंदे गटात प्रवेशही केला आहे. या पार्श्वभूमीवर संपर्कप्रमुख शिंदे यांनी सुपा येथे ठराविक नगरसेवक व पदाधिकाऱ्यांची बैठक घेतली. यावेळी शहरप्रमुख संभाजी कदम, उपजिल्हाप्रमुख भगवान फुलसौंदर, नगरसेवक बाळासाहेब बोराटे, दत्ता कावरे, परेश लोखंडे, संतोष गेनाप्पा, जिल्हा परिषद सदस्य संदेश कार्ले, श्रीकांत पठारे आदी उपस्थित होते.
आमदार शिंदे यांनी नगरसेवकांना थांबण्याचा व पुन्हा विचार करण्याचा सल्ला दिला. मात्र, नगरसेवकांनी आक्रमक भूमिका मांडत पक्षाने अहिल्यानगर शहरातील शिवसैनिक, नगरसेवक, पदाधिकारी सर्वानाच वाऱ्यावर सोडले, कुणाचीही दखल पक्षाने घेतली नसल्याची खंत व्यक्त केली. आता कुणीही ऐकायच्या, थांबण्याच्या मनस्थितीत नाही. कुणासाठी व कशासाठी थांबतील?
थांबल्याने काय होणार आहे, अशा प्रश्नांचा भडीमार नगरसेवकांनी केला. नगर, पारनेर तालुक्यातील सदस्यांनी, पदाधिकाऱ्यांनीही पक्षाच्या भूमिकेबाबत नाराजी व्यक्त केली. यावर आमदार शिंदे निरुत्तर झाले. दरम्यान, लवकरच शिंदे गटात प्रवेशाबाबत नगरसेवक निर्णय घेतील, असे नगरसेवकांकडून सांगण्यात आले
