Pune Crime News: स्वारगेट बस स्थानकात शिवशाही बसमध्ये 26 वर्षीय तरुणीवर झालेल्या अत्याचार प्रकरणाने राज्यभरात संतापाची लाट उसळवली आहे. याप्रकरणी तब्बल 70 तासांनंतर आरोपी दत्ता गाडे याला अटक करण्यात आली. मात्र, या घटनेनंतर एक मोठा प्रश्न समोर येत होता — अत्याचाराच्या वेळी तरुणीचा आवाज बसबाहेर का गेला नाही?
या प्रकरणात आता एक महत्त्वाची माहिती समोर आली आहे. पुणे पोलिसांनी तज्ज्ञांच्या मदतीने बसमधील आवाज बाहेर ऐकू येतो का, याची शास्त्रीय पद्धतीने तपासणी केली. या चाचणीमध्ये असा निष्कर्ष समोर आला की वातानुकूलित शिवशाही बसच्या संरचनेमुळे, मोठ्याने आरडाओरड केल्यासही आवाज बाहेर ऐकू जात नाही.
या प्रकरणाची गंभीरता लक्षात घेता पोलिसांनी फॉरेन्सिक तज्ज्ञांच्या उपस्थितीत बसमध्ये प्रत्यक्ष आवाज चाचणी केली. यात समोर आले की शिवशाही बसमध्ये वापरलेली दाट काच, वातानुकूलित रचना आणि बंद दरवाजांमुळे बाहेर आवाज पोहोचणे अत्यंत कठीण होते. त्यामुळे पीडितेने आरडाओरड केल्यानंतरही कोणालाही त्याचा आवाज ऐकू गेला नाही.
ही बाब तपासाच्या दृष्टीने अत्यंत महत्त्वाची असून आरोपीविरुद्ध मजबूत पुरावे सादर करताना या निष्कर्षाचा वापर केला जाईल, अशी माहिती पोलिसांनी दिली आहे. पोलिसांनी या घटनेनंतर तपासाची दिशा वैज्ञानिक आधारावर नेली असून प्रत्येक गोष्टीचा बारकाईने अभ्यास केला जात आहे.
या अमानुष घटनेनंतर पुणे पोलिसांनी वेगाने तपास सुरू केला. आरोपी दत्ता गाडे हा शिरूर तालुक्यातील त्याच्या गावात एका शेतात लपून बसल्याचे आढळून आले. पोलिसांनी योग्य सापळा रचत त्याला अटक केली. विशेष म्हणजे, गाडे याच्यावर यापूर्वीही गुन्ह्यांची नोंद असून तो रेकॉर्डवरील आरोपी आहे.
25 फेब्रुवारी रोजी पहाटेच्या सुमारास ही घटना घडली, पण दुसऱ्या दिवशीच ती उजेडात आली. प्रशासनाने आणि पोलिसांनी यानंतर तातडीने कारवाई करत आरोपीला पकडले. नागरिकांचा संताप आणि समाजातील तणाव लक्षात घेता, या प्रकरणात पोलिसांनी दक्षता घेत तपास सुरू ठेवला आहे.
